ՌԴ պաշտպանության փոխնախարարը հրապարակել է, թե քանի օտարերկրացի կա «Իսլամական պետության» շարքերում

ԵՐԵՎԱՆ, 4 նոյեմբերի– Sputnik. «Իսլամական պետության» շարքերում շուրջ 25-30 հազար օտարերկրյա գրոհային կա, որոնց թվում կան նաև մարդիկ Ռուսաստանից և Ասիական–խաղաղօվկիանոսյան տարածաշրջանի այլ երկրներից, АСЕАН (Հարավարևելյան Ասիայի երկրների ասոցիացիա) երկրների պաշտպանության նախարարների երրորդ խորհրդակցության ժամանակ հայտարարել է Ռուսաստանի պաշտպանության փոխնախարար Անատոլի Անտոնովը։

«Այսօր «Իսլամական պետության» շարքերում կռվում են 25-30 հազար օտարերկրացի գրոհային ահաբեկիչներ, այդ թվում` Ասիական–խաղաղօվկիանոսյան տարածաշրջանի երկրներից և, դժբախտաբար, Ռուսաստանից։ Եթե նրանք տուն վերադառնան` իրենց հետ բերելով պոտենցիալ բռնություն և ծայրահեղականություն, ապա մեր երկրներում կքարոզեն արմատական գաղափարներ կամ կդառնան դիվերսիաների կազմակերպիչներ»,– ասել է փոխնախարարը։

Անտոնովը նշել է, որ նման սցենարը կանխելը համատեղ առանցքային խնդիրներից մեկն է։

«Իսլամական պետություն» ահաբեկչական խմբավորումն այսօր համաշխարհային անվտանգության գլխավոր սպառնալիքներից է։ Երեք տարիների ընթացքում ահաբեկիչներին հաջողվել է զավթել Իրաքի և Սիրիայի տարածքների զգալի մասը և փորձում են իրենց ազդեցությունը տարածել Հյուսիսային Աֆրիկայում, մասնավորապես` Լիբիայում։ Տարբեր գնահատականներով` ԻՊ–ի վերահսկողության տակ է գտնվում շուրջ 90 հազար ք/կմ տարածք։ Ահաբեկչական կազմակերպության անդամների թվի մասին տվյալները տատանվում են 50-200 հազարի միջև։