ԵՐԵՎԱՆ, 4 նոյեմբերի– Sputnik. Ռոբին Ուիլյամսի այրին դերասանի մահվանից հետո առաջին անգամ հարցազրույց է տվել, որի ժամանակ պատմել է այն հիվանդության մասին, որի դեմ անվանի դերասանը պայքարում էր կյանքի վերջին տարում։ Ռոբին Ուիլյամսի այրու հետ հարցազրույցը հրապարակել է People ամսագիրը։
«Նրա մահվան պատճառը դեպրեսիան չէր։ Դեպրեսիան շուրջ 50 ախտանիշներից ընդամենը մեկն էր»,– ասել է Սյուզան Ուիլյամսը (Շնայդեր)։ Նրա խոսքով` մահվանից մեկ տարի առաջ ամուսնու մոտ սկսել են զարգացող կոգնիտիվ խանգարման նշաններ դրսևորվել։
Այդ ախտանիշների թվում դեպրեսիայի հետ մեկտեղ այրին թվարկում է տագնապի սուր զգացումը, հալյուցինացիաները և մոտորիկայի խախտումները։ Նրա խոսքով` Ուիլյամսն իմացել է, որ չի կարողանում վերահսկել սեփական գիտակցությունը և չի կարողացել հաշտվել այդ մտքի հետ։
Թերթը բացատրում է, որ դեմենցիան, ինչպես նաև Ալցհայմերի հիվանդությունը ձեռքբերովի տկարամտության ամենատարածված տեսակներից են։ Ամերիկյան բժիշկների տվյալներով` այդ չափազանց բարդ ախտորոշվող հիվանդությամբ տառապում է ավելի քան 1 մլն մարդ։
Անվանի դերասան Ռոբին Ուիլյամսն ինքնասպան էր եղել 2014թ.–ի օգոստոսի 12–ին։ Քննիչները ենթադրում էին, որ նրա մահվան պատճառ կարող էր լինել թմրանյութերի չարաշահումը, քանի որ Ուլյամսը երկար տարիներ շարունակ պայքարում էր թմրանյութերի նկատմամբ ունեցած կախվածության դեմ։ Սակայն ավելի ուշ փորձաքննության արդյունքները ցույց էին տվել, որ դերասանի արյան մեջ մահվան պահին հոգեմետ միջոցներ չեն եղել։
Ռոբին Ուիլյամսի այրին հայտարարել է, որ դերասանի ինքնասպանության պատճառը զարգացող տկարամտությունն է եղել
10:34 04.11.2015 (Թարմացված է: 11:08 04.11.2015)
© Exler
Բաժանորդագրվել
Ռոբին Ուիլյամսի այրին դերասանի մահվանից հետո առաջին անգամ հարցազրույց է տվել և պատմել է Ուիլյամսին տանջող հիվանդության մասին
