ԵՐԵՎԱՆ, 3 նոյեմբերի – Sputnik. Տուլայի մոտակայքում երեքշաբթի առավոտյան շրջված ավտոբուսն իրականացնում էր Մոսկվա–Երևան պատվիրված երթուղին, Sputnik Արմենիա պորտալին հայտնեց աղբյուրը։
Ինչպես հայտնել էին ՀՀ տարածքային կառավարման և արտակարգ իրավիճակների նախարարությունից` նոյեմբերի 3-ին՝ տեղական ժամանակով ժամը 03.10-ին, տեղեկատվություն էր ստացվել, որ Տուլայի տարածաշրջանի Ուզլովայա քաղաքի մոտ Մոսկվայից Երևան եկող ավտոբուսը վթարի է ենթարկվել:
«Ավտոբուսը կոնկրետ խումբ էր տեղափոխում, և, հավանաբար, այն պատվերով երթուղի էր իրականացնում», – պարզաբանեց աղբյուրը։
Նախնական տվյալներով` Մոսկվա-Երևան վթարի ենթարկված ավտոբուսը պատկանում է «Կինգ Դելյուքս» ՍՊԸ–ին։
Մասնավորապես, «Կինգ Դելյուքս»–ի երևանյան գրասենյակում նշեցին, որ միջադեպի մանրամասները չգիտեն, կազմակերպության աշխատակիցները ամբողջ տեղեկատվությունը ստանում են ռուսական աղբյուրներից։
«Վարորդներին ինքնությունները մենք չգիտենք, քանի որ նրանք անընդհատ փոխվում են հերթապահությունների ժամանակ», – Sputnik Արմենիա պորտալին հայտնեց «Կինգ Դելյուքս»–ի աշխատակիցը։
Մեր տվյալների համաձայն` երթուղու համար պատասխանատու էր երկու վարորդ, ովքեր ներկա պահին ձերբակալված են։
ՃՏՊ–ից ընդհանուր առմամբ տուժել է 43 մարդ, 7-ը զոհվել է։ Նրանցից 34-ը տեղափոխվել են Ուզլովայա, Կիրեևսկայա և Աստվածածին հիվանդանոցներ։ Ուղևորների մեջ երեխաներ չեն եղել։
Տուլայի մոտ ավտոբուսի վթարի երկու վարկած է դիտարկում օպերատիվ խումբը` վարորդը քնել է ղեկին կամ վթարի պատճառը տեխնիկական անսարքությունն է:
Նախնական վարկածի համաձայն` ավտոբուսի վարորդը քնել է ղեկին։ Ավտոբուսն անցել է ևս 200 մետր, իսկ այնուհետև կողաշրջվել է։ Հրդեհ չի բռնկվել։
Փրկարարական աշխատանքները շարունակվում են: Դեպքի վայրում աշխատում են ԱԻՆ, ՃԵԱՊՏ և շտապօգնության աշխատակիցները։
Ավտովթարից հետո ՌԴ ԱԻՆ Տուլայի մարզի Գլխավոր վարչությունում բացվել է հեռախոսի թեժ գիծ` 8(4872)21-16-09:
