ԵՐԵՎԱՆ, 3 նոյեմբերի – Sputnik. Թուրքական խորհրդարան անցած երեք հայ պատգամավորներն աշխատելու են ի շահ Թուրքիայի հայ համայնքի, Sputnik Արմենիա պորտալին ասաց թուրքագետ Անդրանիկ Իսպիրյանը։
Հրապարակվել են Թուրքիայում անցկացված արտահերթ խորհրդարանական ընտրությունների նախնական արդյունքները, ԿԸՀ–ի ընտրաթերթիկների 100% մշակված տվյալների համաձայն` ընտրություններում հաղթել է Զարգացման ու արդարության կուսակցությունը, որը ստացել է ձայների 49,5% և խորհրդարանի 550 տեղերից` 317-ը։Խորհրդարան անցած կուսակցությունների ցուցակներում երեք հայ պատգամավոր կա։
«Նրանք նույն պատգամավորներն են, ովքեր ընտրվել են նաև անցած անգամ։ Նրանցից երկուսին` Եսայան Մարգարին և Գարո Փայլանին, ճանաչում եմ անձամբ։
Սելինա Դողանին անձամբ չգիտեմ, քանի որ նա մինչ այդ քաղաքականության մեջ չի եղել, սակայն վերջին երեք ամիսների ընթացքում նա իր պահվածքով և գործունեությամբ ցույց է տվել, որ արժանի հայուհի է, ով կարող է օգտակար լինել Ստամբուլի հայ համայնքի համար», – ասաց Իսպիրյանը։
Նրա խոսքերով` ինչ վերաբերում է Կարո Փայլանին, ապա նա բավականին ակտիվ է, հայկական դպրոցի ղեկավար է և հայոց լեզվի պահպանման մեծ ջատագով։
«Մարգար Եսայանը, չնայած այն բանին, որ մի փոքր հետ է մնացել հայ իրականությունից, խոսում է հայերեն և ունի հայկական կրթություն։ Մի ժամանակ մենք քննարկում էինք Ղարաբաղյան հարցը, նա իր լրագրողական հոդվածներում փորձում էր այն հայերի համար շահավետ ձևով ներկայացնել», – ասաց Իսպիրյանը։
Թուրքիայի նախագահ Թաիպ Էրդողանը արտահերթ խորհրդարանական ընտրություններ է հայտարարելմ, քանի որ հունիսի 7-ին Թուրքիայում տեղի ունեցած խորհրդարանական ընտրություններին չհաջողվեց կոալիցիոն կառավարություն ստեղծել: Խորհրդարանում հայտնված 4 կուսակցություններից ոչ մեկին չէր հաջողվել բացարձակ մեծամասնություն ձևավորել (550 պատգամավորից բաղկացած խորհրդարանում մեծամասնություն ապահովելու համար անհրաժեշտ է 275+1 ձայն)՝ միայնակ կառավարություն կազմելու համար: 40.98 տոկոս ձայն ստացած իշխող «Արդարություն և զարգացում» կուսակցությունը խորհրդարան անցած մյուս կուսակցությունների հետ կոալիցիոն կառավարություն կազմելու համար բանակցություններ էր վարում: Սակայն կոալիցիոն կառավարություն կազմելու համար Էրդողանի կողմից լիազորված ԱԶԿ նախագահ և Թուրքիայի վարչապետ Ահմետ Դավութօղլուի` մյուս կուսակցությունների ղեկավարների հետ ունեցած բանակցությունների արդյունքում այդպես էլ կառավարություն կազմելու շուրջ համաձայնության ձեռք չէր բերվել:
