ԵՐԵՎԱՆ, 2 նոյեմբերի – Sputnik. Հայաստանի նախկին վարչապետ Տիգրան Սարգսյանին պաշտոնի նշանակելը կբարձրացնի Հայաստանի դերը Եվրասիական տնտեսական միության մեջ, Երևանում երկուշաբթի լրագրողներին ասաց ՌԴ Դաշնային խորհրդի խոսնակ Վալենտինա Մատվիենկոն:
«Հունվարի 1-ից ԵՏՄ Կոլեգիան կգլխավորի Հայաստանը, մասնավորապես` Տիգրան Սարգսյանը, ով բավականին փորձառու է, ով կանգնած էր ԵՏՄ-ի ձևավորման ակունքներում, այդ իսկ պատճառով ես կարծում եմ, որ նա կնպաստի այս ինտեգրացիոն միության շրջանակներում կապերի խորացմանը, ինչպես նաև այս միության մեջ Հայաստանի դերի բարձրացմանը», — ասաց Մատվիենկոն:
Նրա խոսքերով` անցնող տարին ԵՏՄ-ի կայացման, փաստաթղթա-կազմակերպչական բազայի և փոխհարաբերությունների ձևավորման տարի էր:
«Միևնույն ժամանակ մենք ակնհայտ առաջընթաց ենք տեսնում տնտեսական համագործակցության զարգացման, առևտրային կապերի, ներդրումային համագործակցության մեջ, և ինչը շատ կարևոր է, հայ-ռուսական հարաբերությունները սոսկ առևտրատնտեսական հարաբերություններ չեն, դրանք նպաստում են նորարարական համագործակցության զարգացմանը, տնտեսության տեղափոխմանը ժամանակակից հուն, ինչը ժամանակի ընթացքում կունենա իր արդյունքներեը», — ասաց Մատվիենկոն:
Նրա խոսքերով` միջխորհրդարանական երկխոսությունը բավականին աշխույժ է, սուր, սակայն` բարիդրացիական մթնոլորտում:
«Հենց այդպես պետք է խոսեն բարեկամները` չթաքցնելով խնդիրներն ու միասին մտածելով ապագայի մասին: Ես բավարարված եմ նրանով, որ ԱԺ-ում նաև ընդդիմության ներկայացուցիչներն են հանդես գալիս հայ-ռուսական բազմակողմանի համագործակցության ընդլայնման և խորացման համար և′ տնտեսական, և′ մարդասիրական, և′ մշակության բնագավառներում», — նշեց Մատվիենկոն:
