ԵՐԵՎԱՆ, 2 նոյեմբերի – Sputnik. Թուրքիայի նախագահ Ռեջեփ Թաիպ Էրդողանը գրեթե հասել է իր նպատակին երկրում ավարտված խորհրդարանական ընտրությունների արդյունքում, Sputnik Արմենիա պորտալին ասաց թուրքագետ Անդրանիկ Իսպիրյանը։
Հրապարակվել են Թուրքիայում անցկացված արտահերթ խորհրդարանական ընտրությունների նախնական արդյունքները, ԿԸՀ–ի ընտրաթերթիկների 100% մշակված տվյալների համաձայն` ընտրություններում հաղթել է Զարգացման ու արդարության կուսակցությունը, որը ստացել է ձայների 49,5% և խորհրդարանի 550 տեղերից` 317-ը։
«Ընտրություններին եղել է այն, ինչ նախատեսում էր Էրդողանը։ Երեք ամսվա ընթացքում նա ձգտում էր այս արդյունքին, և նրան հաջողվեց հասնել իր նպատակին։ Ընտրություններում հաղթանակի նա հասավ աստիճանաբար` արևելյան գավառներում քաոսի ստեղծմամբ, քրդերի նկատմամբ թշնամանք սերմանելով և, իհարկե, մի շարք կեղծիքներով», – ասաց Իսպիրյանը։
Նրա խոսքերով` Էրդողանն ավելին ստացավ, քան պահանջվում էր միանձնյա կառավարություն ձևավորելու համար, սակայն ավելի քիչ, քան անհրաժեշտ էր նախագահական կառավարման համակարգի անցնելու համար։
«Նրան անհրաժեշտ է 330 և ավելի տեղ խորհրդարանում, իսկ այժմ նա, նախնական տվյալների համաձայն. կունենա 317։ Հիմնական նպատակին հասնելու համար շատ քիչ է մնացել, այդ պատճառով նա կփորձի կոալիցիա ստեղծելու միջոցով կամ որոշակի փոխզիջումների գնալու միջոցով ստանալ նաև այդ ձայները», – նշեց Իսպիրյանը։
Նրա կարծիքով` Էրդողանին պակասում է մոտ 15 ձայն, և նախագահական մոդելին անցնելն ավելի հեշտ կլինի, քան առաջ։
«Չի կարելի 100 տոկոսով պնդել, սակայն նա գրեթե հաջողության է հասել», – ընդգծեց Իսպիրյանը։
Թուրքիայի նախագահ Թաիպ Էրդողանը արտահերթ խորհրդարանական ընտրություններ է հայտարարել, քանի որ հունիսի 7-ին Թուրքիայում տեղի ունեցած խորհրդարանական ընտրություններին չհաջողվեց կոալիցիոն կառավարություն ստեղծել: Խորհրդարանում հայտնված 4 կուսակցություններից ոչ մեկին չէր հաջողվել բացարձակ մեծամասնություն ձևավորել (550 պատգամավորից բաղկացած խորհրդարանում մեծամասնություն ապահովելու համար անհրաժեշտ է 275+1 ձայն)՝ միայնակ կառավարություն կազմելու համար: 40.98 տոկոս ձայն ստացած իշխող «Արդարություն և զարգացում» կուսակցությունը խորհրդարան անցած մյուս կուսակցությունների հետ կոալիցիոն կառավարություն կազմելու համար բանակցություններ էր վարում: Սակայն կոալիցիոն կառավարություն կազմելու համար Էրդողանի կողմից լիազորված ԱԶԿ նախագահ և Թուրքիայի վարչապետ Ահմետ Դավութօղլուի` մյուս կուսակցությունների ղեկավարների հետ ունեցած բանակցությունների արդյունքում այդպես էլ կառավարություն կազմելու շուրջ համաձայնության ձեռք չէր բերվել:
