ԵՐԵՎԱՆ, 1 նոյեմբերի – Sputnik. Կահիրեից զոհվածների մարմինները տեղափոխող առաջին ինքնաթիռը Պետերբուրգ կհասնի կիրակի երեկոյան, հայտնում է «Ռոսիա 24» հեռուստաալիքը` հղում անելով օպերատիվ շտաբին:
Airbus A321 ինքնաթիռը, որը շաբաթ օրն իրականացնում էր Շարմ էլ Շեյխ – Սանկտ Պետերբուրգ չվերթը, ավիավթարի էր ենթարկվել Սինայի թերակղզու տարածքում: Ինքնաթիռում գտնվում էր 217 ուղևոր և օդանավի անձնակազմի 7 անդամ:
«Նախատեսվում էր Կահիրեից զոհվածների մարմինների տեղափոխումն իրականացնել առավոտյան ժամը 9-ին (Մոսկվայի ժամանակով), սակայն հաղորդում ստացվեց, որ ինքնաթիռն ուշանում է, և այն Պետերբուրգ կհասնի ոչ շուտ, քան երեկոյան: Համենայն դեպս, այսպիսի տեղեկություն է ստացվել Պետերբուրգում գտնվող օպերատիվ շտաբ», — ասել է թղթակիցը:
Նա ավելացրել է, որ մեկ ինքնաթիռը կարող է տեղափոխել մոտ 80 մարմին:
Կահիրեում ՌԴ դեսպանատանը բացվել է 8-10-2-0128-009-5099 թեժ գիծը: Ինչպես նաև գերատեսչության կողմից բացվել է 8(495) 926-55-11 Ռուսաստանի ԱԳՆ Իրավիճակային-ճգնաժամային կենտրոնի շուրջօրյա թեժ գիծ:
