ԵՐԵՎԱՆ, 31 հոկտեմբերի – Sputnik. Ռումինիայի մայրաքաղաքում անցյալ գիշեր ուժեղ հրդեհ է բռնկվել Colectiv գիշերային ակումբում, որի հետևանքով մահացել է 27 մարդ, ևս 200-ը տուժել են: Նրանցից շատերի վիճակը բժիշկները գնահատում են կայուն ծանր, հայտնում է Sputnik Ուզբեկստանը:
Նախնական տվյալներով` հրդեհի բռնկման պատճառը կարող է լինել ռոք համերգի ժամանակ արված հրավառությունը: Վկաների խոսքերով` բռնկվել էր ակումբի փայտե առաստաղը, իսկ միակ գործող ելքի մոտ հերթ է գոյացել: Ակումբում ողբերգության պահին, տարբեր տվյալների համաձայն, գտնվում էր 300-400 մարդ:
«Երբ բեմ բարձրացավ Goodbye to Gravity խումբը, հրավառություն սկսվեց: Ակումբի փայտե առաստաղը բռնկվեց: Միայն մեկ ելքն էր բաց: Ամբոխն ուղղվեց դեպի այդ ելքը, արդյունքում հրմշտոց սկսվեց: Մարդիկ վնասվածքներ ստացան, ոմանք շնչահեղձ եղան ամբոխի մեջ», — ասաց ականատեսը:
Հրավառություն սկսվեց «Այն օրը, երբ մենք կմահանանք» կոմպոզիցիայի ժամանակ:
Երկրի ՆԳՆ-ն հայտնել է, որ ակումբում ավարտվել են փրկարարական աշխատանքները:
Ականատեսի վկայությամբ` Բուխարեստի հիվանդանոցը ողբերգության առաջին ժամերին, ազատ տեղերի բացակայության պատճառով, չկարողացավ ընդունել բոլոր տուժածներին:
Դեպքի վայրից հիվանդանոց տեղափոխվածներից շատերը 18-25 տարեկան երիտասարդներ են, որոնք 70-80% այրվածքներ են ստացել: Հիվանդների վիճակը գնահատվում է ծանր կայուն:
«Ցավոք, պետք է ասել, որ զոհերի թիվը կարող է ավելանալ», — հեռախոսազրույցի ժամանակ ասել են Բուխարեստի շրջանային հիվանդանոցի ներկայացուցիչները:
Առողջապահության նախարարությունը դիմել է Բուխարեստի բնակիչներին` տուժածների համար արյուն հանձնելու խնդրանքով: Սոցիալական ցանցերում նույնպես էջեր ու խմբեր են ստեղծվել, որտեղ կոչ է արվում արյուն հանձնել և օգնություն ցուցաբերել տուժածներին:
ՆԳՆ-ն մի քանի թեժ գիծ է բացել տեղեկատվությունը ճշտելու համար: Նմանատիպ հայտարարություն է տարածվել նաև համացանցով: Հրդեհի փաստով հարուցվել է քրեական գործ։
Տուժածների և զոհերի ընտանիքներին ցավակցություն է հայտնել Ռումինիայի նախագահ Կլաուս Յոհանիսը:
«Ես ցնցված եմ և խորապես վշտացած` այսօր գիշերը քաղաքի կենտրոնում կատարվածի համար: Սա չափազանց տխուր պահ է բոլորիս համար, մեր ժողովրդի և անձամբ ինձ համար”, — Facebook-ի իր էջում գրել է Յոհանիսը:
Փաստի առիթով Ռումինիայի մայրաքաղաքում շաբաթ օրն վաղ առավոտյան արտակարգ իրավիճակների ազգային կոմիտեի նիստ է հրավիրվել, որի շրջանակում նախարարները քննարկում են գիշերային ակումբում կատարված միջադեպը, լրագրողներին հայտնել է ներքին գործերի նախարար Գաբրիել Օպրյան:
