ԿՀՎ–ի նախկին աշխատակիցը պատմել է ԻՊ–ի գաղտնի նավթատարի մասին

ԵՐԵՎԱՆ, 30 հոկտեմբերի  – Sputnik. Ամերիկյան սենատի միջազգային հարաբերությունների կոմիտեի ավագ քննիչ և Կենտրոնական հետախուզական վարչության նախկին աշխատակից Ջոն Կիրիակուն ենթադրում է, որ «Իսլամական  պետություն» ահաբեկչական խմբավորման գրոհայինները նավթի անօրինական արտահանումն իրականացնում են Իրանական Քրդստանի ու Թուրքիայի տարածքներով, և իշխանությունն այդ հարցում օգնում է գրոհայիններին։

«Ես միշտ ենթադրել եմ, որ թուրքական կողմում ինչ–որ մեկը կլորիկ գումար է աշխատում այդ ամենի արդյունքում։ Չափազանց շատ են շահագրգռված անձինք, որպեսզի այդ ամենը հեշտությամբ դադարեցվի»,– ասել է Կիրիակուն։

ԿՀՎ–ի նախկին աշխատակիցն ասել է, որ ահաբեկիչների համար հասանելի ամենահարուստ նավթային հանքաշերտերը գտնվում են Իրաքի հարավում, իսկ մատակարարումների ամենաակնհայտ երթուղին անցնում է քրդերի տարածքով։

Թուրքիան ՆԱՏՕ–ի անդամ է, և արդեն 60 տարի է` ԱՄՆ–ի դաշնակիցը, սակայն Կիրիակուն ասում է, որ թուրքական կառավարությունն անզոր է տեղի իշխանությունների նկատմամբ։

ԱՄՆ–ի ֆինանսների նախարարության տվյալով` ԻՊ–ն շուրջ 1 միլիարդ դոլար է ստացել բանկերը գրավելու համար և շարունակում է ամսական 10-ից 50 միլիոն դոլար աշխատել նավթի վաճառքից։