Կվերաօծվի և կբացվի Թբիլիսիի սուրբ Գևորգ եկեղեցին

ԵՐԵՎԱՆ, 30 հոկտեմբերի– Sputnik. Հայ առաքելական եկեղեցու Վիրահայոց թեմի սուրբ Գևորգ առաջնորդանիստ եկեղեցու վերաօծման և բացման արարողությունը տեղի կունենա հոկտեմբերի 30-31–ին Թբիլիսիում։

Եկեղեցու օծման կարգը սկսվել է հոկտեմբերի 30–ին` ժամը 12։00–ին։ Վիրահայոց թեմի առաջնորդ գերաշնորհ Տեր Վազգեն եպիսկոպոս Միրզախանյանի ձեռամբ կօծվեն եկեղեցու 12 սյուները և սուրբ Սարգիս զորավար և Սրբոց Վարդանանց խորանը։

Հոկտեմբերի 31–ին ձեռամբ Գարեգին Բ Ամենայն հայոց կաթողիկոսի կօծվեն տաճարի Սուրբ սեղանը, Մկրտության ավազանը, խորանը և Սուրբ Ավետարանիչների սյուները։ Վեհափառ հայրապետի կողմից կկատարվի բարերարների պարգևատրում։ Նույն օրը ժամը 13։00–ին նորաօծ առաջնորդանիստ եկեղեցում կմատուցվի անդրանիկ Սուրբ և Անմահ պատարագ։

Եկեղեցու վերանորոգման նախաձեռնողը հայազգի գործարար և բարերար Ռուբեն Վարդանյանն է։ Նա ընտանիքով Թբիլիսի այցելության ժամանակ տեսել է նորացված հին քաղաքում Թբիլիսիի գլխավոր եկեղեցու` Սուրբ Գևորգի անմխիթար վիճակն ու որոշում կայացրել ստեղծել Սուրբ Գևորգ եկեղեցու վերանորոգման հիմնադրամ և դրա շուրջ հավաքել մի շարք գործարարների և մտահոգ մարդկանց` Վերոնիկա Զոնաբենդ, Սերգեյ Սարկիսով, Ռուսուդան Սախաշվիլի, Բիձինա Իվանիշվիլի, Դանիիլ Խաչատուրով, Բորիս և Գոռ Նահապետյաններ, Անդրեյ Մկրտչյան։