ԵՐԵՎԱՆ, 29 հոկտեմբերի– Sputnik. Հայաստանի և Ադրբեջանի նախագահները հաստատել են մինչև տարեվերջ բարձր մակարդակի հանդիպում անցկացնելու պատրաստակամությունը, ասված է Մինսկի խմբի համանախագահների` հոկտեմբերի 26-28-ին տարածաշրջան կատարած այցի արդյունքներով համատեղ հայտարարության մեջ:
Հայաստանի և Ադրբեջանի նախագահներ Սերժ Սարգսյանն ու Իլհամ Ալիևը հաստատել են մինչև տարեվերջ ԵԱՀԿ Մինսկի խմբի համանախագահների հովանու ներքո հանդիպում անցկացնելու իրենց հանձնառությունը` քննարկելու կարգավորման կարևոր բաղադրիչներն ու այլ խնդիրներ, ասված է հայտարարությունում։
«Նախագահների հետ հանդիպումներում մենք ընդգծել ենք շփման գծում և հայ-ադրբեջանական սահմանին բռնության վտանգները: Ծանր սպառազինությունների օգտագործումը, ինչպիսին են ականանետերն ու հրթիռային կայանքները, անընդունելի է և լուրջ վտանգ է ներկայացնում քաղաքացիական բնակչության համար: Մենք խորապես ցավում ենք անմեղ քաղաքացիների շրջանում զոհերի համար և ակնկալում ենք, որ կողմերը կձեռնարկեն ամեն քայլ` խուսափելու բռնությունից: Մենք ներկայացրել ենք առկա առաջարկությունները` ուղղված անվտանգության ոլորտում իրադրության կայունացմանը և բանակցությունների համար առավել կառուցողական մթնոլորտ ստեղծելուն»,- նշում են համանախագահները:
Հայտարարության մեջ անդրադարձ է արվում նաև հոկտեմբերի 27-ին ԵԱՀԿ առաքելության` շփման գծի դիտարկման ժամանակ գրանցված գնդակոծությանը:
«ԵԱՀԿ համանախագահների կողմից շփման գիծը հատելուց անմիջապես հետո անհայտ վայրից կրկնվող գնդակոծությունը ԵԱՀԿ դիտորդներին ստիպեց պատսպարվել: Կողմերը պարտավորվել էին երաշխավորել դիտորդական անձնակազմի անվտանգությունը: Այս միջադեպը կարգավորման ճանապարհին առաջընթացը խաթարելու դիտավորյալ փորձ է: Այն նաև ընդգծում է ԵԱՀԿ-ի` հրադադարի խախտումները հետաքննելու հնարավորություն ունենալու անհրաժեշտությունը»,- ասված է հայտարարության մեջ:
Լեռնային Ղարաբաղի խնդրով Հայաստանի և Ադրբեջանի միջև հակամարտությունը սկսվել է 1988թ.–ի փետրվարին, երբ Լեռնային Ղարաբաղի ինքնավար մարզը հայտարարեց Ադրբեջանական ԽՍՀ կազմից դուրս գալու մասին։ 1991թ.–ի սեպտեմբերին ԼՂԻՄ կենտրոնում` Ստեփանակերտում, հայտարարվեց Լեռնային Ղարաբաղի Հանրապետություն ստեղծելու մասին։ Ադրբեջանը դրան հաջորդած ռազմական հակամարտության ընթացքում կորցրեց հսկողությունը Լեռնային Ղարաբաղի նկատմամբ։
1992թ.–ից հակամարտության խաղաղ կարգավորման բանակցություններ են ընթանում ԵԱՀԿ Մինսկի խմբի շրջանակում։ Ադրբեջանը պնդում է իր տարածքային ամբողջականության պահպանումը, Հայաստանը պաշտպանում է չճանաչված հանրապետության շահերը, քանի որ ԼՂՀ–ն բանակցությունների կողմ չէ։
