Դեկտեմբերին եղանակը բարդ կլինի թռիչքներ իրականացնելու համար

ԵՐԵՎԱՆ, 26 հոկտեմբերի – Sputnik. Հայաստանում վերջին մի քանի օրվա ընթացքում հաստատված եղանակը խոնավ Լոնդոնն է հիշեցնում։ Մարդկանցից շատերին հուզում է այն հարցը, թե արդյո՞ք եղանակային այս պայմանները չեն ազդի Հայաստանից այլ երկրներ իրականացվող թռիչքների վրա։

Sputnik Արմենիա պորտալին երեկ հայտնել էին, որ սաստիկ մրրկայնության պատճառով Երևան–Մոսկվա չվերթի ուղևորները սկսել են «ցնցվել»։

Լոնդոնի եղանակը` Երևանում

Օդաչուների համար թռիչքներ իրականացնելու ամենաբարդ ժամանակահատվածը ձմեռն է, քանի որ մառախուղն ու մշուշը նվազեցնում են տեսանելիությունը։ Այդ առումով բարդ ամիսներ են հատկապես դեկտեմբերն ու հունվարը։

Հայաստանի քաղավիացիայի գլխավոր վարչության մամուլի քարտուղար Ռուբեն Գրձելյանը, պատասխանելով Sputnik Արմենիա պորտալի հարցին, ասաց, որ այս պահին թռիչքների իրականացման հետ կապված խնդիրներ չկան, բոլոր թռիչքներն իրականացվում են ըստ չվացուցակի, օդանավակայանի ու բոլոր ծառայությունների աշխատանքները շարունակվում են սովորական ռեժիմով։

Գրձելյանը հստակեցրեց, թե դեկտեմբերին և երբեմն հունվարին ինչը կարող է թռիչքների հետ կապված խնդիրներ առաջացնել։

«Պարզապես մեր տարածաշրջանը դեկտեմբերին խիտ մառախուղով է պատվում, երբեմն միաժամանակ փակվում են և՛ Երևանի, և՛ Թբիլիսիի օդանավակայանները։ Եթե մեր օդային տարածքը փակվում է, այդ դեպքում օգտագործվում են Թբիլիսիի, Գյումրու, Թեհրանի և Սոչիի օդանավակայանները»,– ասաց Գրձելյանը։

Ինչ վերաբերում է ընթացիկ տարվա դեկտեմբեր–հունվարին, ըստ նրա, կանխատեսումներ անելու կարիք չկա, քանի որ մառախուղը սովորական երևույթ է Հայաստանի համար։

Մտահոգվելու կարիք չկա

Թեև ձմռանը եղանակն ավելի քմահաճ է, քան տարվա մյուս եղանակներին, այնուհանդերձ հայ արհեստավարժ օդաչուները չվերթերն իրականացնում են ժամանակին` առանց վտանգելու ուղևորների կյանքը։

Գրձելյանը նշեց նաև, որ երբ տեսանելիությունը թույլատրելի մակարդակից ցածր է լինում, այդ դեպքում օդանավը պարզապես երկինք չի բարձրանում։

««Զվարթնոց» օդանավակայանի համար ամպերի ստորին շերտի թույլատրելի մակարդակը 100 ֆուտն է, իսկ Գյումրու համար` 200 ֆուտը։ Երբ տեսանելիությունը թույլատրելի մակարդակից ցածր է, օդաչուն մի քանի պտույտ է անում, և եթե ամպամածությունը չի նահանջում, այդ դեպքում ինքնաթիռը վայրէջք է կատարում պահուստային օդանավակայանում»,– ասաց ՔԱԳՎ մամուլի քարտուղարը։