ԱՀԿ. առևտրային ռեժիմի դյուրացման համաձայնագիրը կավելացնի համաշխարհային ՀՆԱ–ի ծավալը

ԵՐԵՎԱՆ, 26 հոկտեմբերի – Sputnik. Առևտրի համաշխարհային կազմակերպությունը (ԱՀԿ) մասնակից–երկրներին կոչ է անում որքան հնարավոր է շուտ վավերացնել առևտրային ռեժիմի պարզեցման համաձայնագիրը և անցնել դրա իրականացմանը, քանի որ այդ համաձայնագրի շնորհիվ համաշխարհային ՀՆԱ–ն կաճի 0,5%–ով։ Մամուլի ասուլիսի ժամանակ այս մասին խոսել է ԱՀԿ–ի գլխավոր տնօրեն Ռոբերտո Ազևեդոն։

«Առևտրային ռեժիմի պարզեցման համաձայնագրի լիարժեք իրականացման արդյունքում առևտրային ծախսերը կկրճատվեն միջինը 14,3%–ով, ինչը զգալիորեն կազդի համաշխարհային տնտեսության վրա։ Բացի այդ, արտահանումից ստացված եկամուտները, ինչպես ենթադրվում է, կկազմեն տարեկան մինչև 1 տրիլիոն դոլար, ինչը մեծ խթան կհանդիսանա համաշխարհային տնտեսության զարգացման համար», – ասել է նա։

Ազևեդոյի խոսքով` 2015-2030 թվականներին առևտրային ռեժիմի պարզեցման համաձայնագրի իրականացումը տարեկան մոտ 2,7%–ով կավելացնի համաշխարհային արտահանման աճը, 0,5%–ով` համաշխարհային ՀՆԱ–ի աճը։

ԱՀԿ–ի գլխավոր տնօրենը նշել է, որ մոտակա ամիսների ընթացքում համաձայնագիրը վավերացրած երկրների թիվը չի ավելանա։ Սակայն նա հույս է հայտնել, որ փաստաթղթի վավերացման գործընթացը հնարավորին չափ շուտ կիրականացվի։ Ներկա պահին փաստաթուղթը վավերացրել է ԱՀԿ 161 մասնակից–երկրներից մոտ 50–ը։

Ազևեդոն ընդգծել է, որ համաձայնագրի իրականացումը կարևոր քայլ կդառնա գլոբալ տնտեսական համագործակցության գործում։

ԱՀԿ–ն երկուշաբթի Ժնևում նոր զեկույց է ներկայացրել առևտրի վերաբերյալ։ Փաստաթուղթն առաջին գլոբալ ուսումնասիրությունն է, որը ցույց է տալիս է, թե  առևտրային գործընթացի պարզեցման համաձայնագրի իրականացումն ինչ ազդեցություն է թողել համաշխարհային տնտեսության վրա։ Համաձայնագիրն ընդունվել է ԱՀԿ գիտաժողովի ժամանակ, որն անցկացվել է 2013 թվականին Բալիում։ Զեկույցում նշվում է, որ համաձայնագրի իրականացումը առևտրային ծախսերը կկրճատի 14,3%–ով։ Կանխատեսվում է նաև, որ գլոբալ արտահանման աճը կաճի 3,6 տրիլիոն դոլարով։ Այսպիսով, համաձայնագրի իրականացումից ավելի շատ կշահեն զարգացող երկրները, կարծում են ԱՀԿ փորձագետները։