ԵՐԵՎԱՆ, 25 հոկտեմբերի- Sputnik. Շաբաթ օրը Հռոմի կաթոլիկ եկեղեցու եպիսկոպոսների Սինոդի մասնակիցները հաստատել են վերջնական զեկույցը, որում պահպանվում է միասեռ ամուսնությունների արգելքը, խոսվում է մանկապղծության նկատմամբ «զրոյական հանդուրժողականության» և այն մասին, որ կրկնակի ամուսնության հարցի վերաբերյալ որոշումներն առաջվա պես կընդունեն տեղի հոգևորականները:
Ամփոփիչ փաստաթուղթը պատրաստել է 10 հոգուց կազմված հատուկ հանձնաժողովը, որի անդամներին նշանակել է Հռոմի պապ Ֆրանցիսկոսը: Զեկույցը կազմված է 94 գլխից, որոնցից յուրաքանչյուրի շուրջ առանձին քվեարկություն է անցկացվել: Հաստատված զեկույցի կետերից մեկը նվիրված է համասեռամոլությանը: Նշվում է, որ եկեղեցին չի ընդունում նույնասեռականների ամուսնությունները:
Միաժամանակ եպիսկոպոսները նշել են, որ պետք է հարգանքով վերաբերվել ցանկացած սեռական կողմնորոշում ունեցող մարդու: Բացի այդ, զեկույցում խոսվում է մանկապղծության նկատմամբ «զրոյական հանդուրժողականության» մասին, իսկ ընտանիքում բռնության հարցում ընդգծվում է իրավապահ մարմինների հետ սերտ համագործակցության անհրաժեշտությունը:
Սինոդի XIV վեհաժողովը նվիրված էր եկեղեցու կյանքում և ժամանակակից աշխարհում ընտանիքի կատարած դերին: Սինոդին մասնակցել է հինգ աշխարհամասի 270 ներկայացուցիչ, որոնց թվում՝ 74 կարդինալ, 102 եպիսկոպոս, 2 ծխական քահանա, 24 փորձագետ և 51 ունկնդիր: Սինոդին մասնակցել է նաև 18 ընտանեկան զույգ, որոնք բանավեճերի ընթացքում խոսել են ժամանակակից ընտանիքում առկա առավել սուր խնդիրների մասին:
Հռոմի կաթոլիկ եկեղեցու Սինոդը հաստատել է միասեռ ամուսնությունների արգելքը
Բաժանորդագրվել
Եպիսկոպոսներն իրենց զեկույցում հաստատել են, որ եկեղեցին չի ընդունում միևնույն սեռին պատկանող մարդանց ամուսնությունները
