ԵՐԵՎԱՆ, 23 հոկտեմբերի – Sputnik. Դատապարտյալներին առցանց ծանրոցներ պատվիրելու հնարավորություն ընձեռելու մասին կառավարության որոշումը մինչև վերջ մշակված չէ, դատապարտյալները պետք է հնարավորություն ունենան անձամբ առցանց պատվերներ կատարել, Sputnik Արմենիա պորտալին ասաց իրավաբան Դավիթ Գյուրջյանը։
Հայաստանի կառավարությունը հինգշաբթի կայացած նիստում որոշում է ընդունել, որի համաձայն` Հայաստանի քրեակատարողական հիմնարկներ ծանրոցներ կարելի է պատվիրել համացանցի միջոցով։
«Կարծում եմ` մտահղացումը վատը չէ` հաշվի առնելով ժամանակակից տեխնոլոգիաների հնարավորությունների աճը: Սակայն ընդունված որոշմամբ չեն շոշափվել շատ կարևոր հարցեր, մասնավորապես՝ առաջին հերթին պետք է հնարավորություն ստեղծվի հենց դատապարտյալ կամ կալանավորված անձանց համար այդ առցանց պատվերները ինքնուրույն կատարելու համար, ինչն, իհարկե, կապված է մի շարք այլ չլուծված խնդիրների հետ», – ասաց Գյուրջյանը։
Նրա խոսքերով` միաժամանակ որոշման մեջ չի արտացոլվում «Աջակցություն դատապարտյալներին» հիմնադրամի մատուցած ծառայությունների գինը, ինչը նույնպես չի թողնում խոսել այդ ծառայության մատչելիության մասին։
«Նաև ընթերցելով որոշումը` բացահայտում ենք, որ հասցեատիրոջ կողմից պատվերը ստանալու փաստը հավաստող փաստաթուղթը պատվիրատուին հանձնելու ընթացակարգ նախատեսված չէ: Խոսքը երկու օրինակի մասին է, որից մեկը քրեակատարողական հիմնարկի աշխատակիցը հանձնում է հիմնադրամին, իսկ երկրորդի ճակատագիրն անորոշ է մնում», – նշեց իրավաբանը։
Ինչպես ավելի վաղ հայտնել էր Հայաստանի արդարադատության նախարար Արփինե Հովհաննիսյանը, այսպիսով կարելի է բացառել անթույլատրելի իրերի անցկացման վտանգը` հրաժարվելով ծանրոցները ձեռքից ձեռք փոխանցելուց։ Բացի այդ, հնարավոր կլինի խուսափել դատապարտյալների բարեկամների հետ քրեակատարողական հիմնարկների աշխատակիցների շփումից առաջացած կոռուպցիոն ռիսկերի հետ կապված խնդիրներից։
