ԵՐԵՎԱՆ, 23 հոկտեմբերի – Sputnik. Չափավոր ընդդիմություն, որը կկարողանար Ասադին զգալի օգնություն ցուցաբերել սիրիական հակամարտության հարցում, գոյություն չունի, Sputnik Արմենիա պորտալին ասել է արաբագետ Սարգիս Գրիգորյանը
Սիրիայի նախագահ Բաշար Ասադը Մոսկվայում Վլադիմիր Պուտինի հետ հանդիպման ժամանակ նշել է, որ երկրի կառավարությունը մտադիր է համագործակցել ցանկացած ընդդիմության հետ, որը կաջակցի ահաբեկիչների դեմ գործողություններին և իսկապես պատրաստ կլինի պայքարել «Իսլամական պետության» դեմ։
«Սիրիայում չկա ընդդիմություն, որը ազդեցիկ ուժ կլիներ և որի հետ միավորվելով` Բաշար Ասադը կկարողանար զգալիորեն փոխել հակամարտության ընթացքը։ Կարծում եմ, որ սա կարելի է դիտարկել զուտ որպես քաղաքական հայտարարություն», – ասել է Գրիգորյանը` մեկնաբանելով Սիրիայի նախագահի դիրքորոշումը։
Նրա կարծիքով` Արևմուտքն ու Ռուսաստանը պարզապես պայմանավորվել են սիրիական հակամարտության ապագա կարգավորման վերաբերյալ։
«Արևմուտքը, բնականաբար, փորձում է առաջ տանել ընդդիմության և չափավոր ուժերի հետ համագործակցելու գաղափարը, որոնք նույնպես լուրջ ուժ չեն։ Այդ ուժերը, որոնք աջակցություն կստանան Արևմուտքից, ապագայում պետք է իրենց դերը խաղան ժամանակավոր կառավարության ստեղծման գործում։ Արևմուտքը պետք է ցույց տա, որ Սիրիայում ոչ միայն Ասադը, այլև չափավոր ընդդիմություն գոյություն ունի», – ասել է Գրիգորյանը։
Նրա խոսքերով` Պուտինի հնչեցրած հայտարարությունների նման հայտարարություններ հավանաբար կհնչեն նաև Արևմուտքից։
«Հալեպի շուրջ` Հոմսի և Համայի տարածաշրջանում, կառավարական զորքերը բավականին հաջող գործողություններ են իրականացնում», – ասել է Գրիգորյանը։
Սիրիայում 2011 թվականի մարտից շարունակվում է զինված հակամարտությունը, որի հետևանքով, ՄԱԿ–ի տվյալների համաձայն, զոհվել է ավելի քան 250 հազար մարդ։ Կառավարական զորքերը դիմակայում են տարբեր զինված կազմավորումներին պատկանող գրոհայինների ջոկատներին։ Դրանցից առավել ակտիվ են «Իսլամական պետություն» և «Ջեբհաթ ան Նուստրա» ծայրահեղական խմբավորումների գրոհայինները։
Ռուսաստանը, նախագահ Բաշար Ասադի խնդրանքով, սեպտեմբերի 30-ից սկսել է թիրախային ավիահարվածներ հասցնել Սիրիայում «Իսլամական պետության» օբյեկտներին։
