Պուտին. իսլամի և գրոհայինների տարածած ստի մեջ պետք է սահմանագիծ դնել

ԵՐԵՎԱՆ, 23 հոկտեմբերի- Sputnik. ՌԴ նախագահ Վլադիմիր Պուտինը ելույթ է ունեցել «Վալդայ» բանավեճի ակումբի 12-րդ ամենամյա նիստի լիագումար նստաշրջանում:

Վլադիմիր Պուտինը ժամանել է «ԱվտոՎԱԶ»-ի արտադրած «Լադա Վեստա» մոդելով: Նախագահը նշել է, որ գոհ է ավտոմեքենայից

Նիստում Պուտինը խոսել է ԱՄՆ-ի սահմանած պատժամիջոցների մասին:

«Տուժում են նաև եվրոպական ընկերությունները. այդպես են վարվում ոչ թե դաշնակիցների, այլ այն վասալների հետ, որոնց պատժում են»,- ասել է ՌԴ նախագահը:

ՌԴ նախագահը կարծում է, որ աշխարհում միջուկային զենքի հայտնվելու հետ մեկտեղ գլոբալ հակամարտությունում չեն կարող հաղթողներ լինել: Հետևանքը կարող է միայն մեկը լինել` երաշխավորված փոխադարձ ոչնչացում:

«Այնպես է ստացվել, որ մարդն ավելի ու ավելի ավերիչ զենք ստեղծելու փորձեր անելով` անիմաստ է դարձրել մեծ պատերազմը: Ի դեպ, 50-60-70-ական թվականներին և նույնիսկ 80-ական թվականներին համաշխարհային առաջնորդների սերունդները ռազմական ուժի կիրառումը բացառիկ միջոց էին համարում և պատասխանատվությամբ էին մոտենում այդ հարցին»,- ասել է նախագահը:

Պուտինի կարծում է, որ որոշ երկրներ երկակի խաղ են վարում` պայքարելով ահաբեկչության դեմ` միևնույն ժամանակ «խաղատախտակի վրա խաղաքարերը դասավորելով» իրենց շահերին համապատասխան:

ՌԴ նախագահը նաև հայտարարել է, որ պետք է հստակ սահմանագիծ դնել իրական իսլամի և այն ստի միջև, որը տարածում են իսլամով քողարկվող գրոհայիննեերը:

Նա անդրադարձել է նաև միգրացիայի թեմային: ՌԴ նախագահի խոսքով` միգրացիայում անկառավարելի գործընթացները հանգեցնում են նրան, որ աճում են ազգայնամոլությունն ու անհանդուրժողականությունը, հասարակության մեջ շարունակական հակամարտությունները:

2015թ.-ին «Վալդայ» բանավեճերի ակումբի նիստի թեման է «Պատերազմ և խաղաղություն. մարդը, պետությունը և մեծ հակամարտության սպառնալիքը 21-րդ դարում»: