ԵՐԵՎԱՆ, 22 հոկտեմբերի – Sputnik. Ամերիկյան կինոակադեմիայի «Օսկար» մրցանակաբաշխությունը կվարի ամերիկացի կատակերգու Քրիս Ռոքը, ասվում է «Օսկարի» կայքում:
«Քրիս Ռոքն իսկապես արժեքավոր դեր ունի կինոյի ոլորտում», — հայտնել են «Օսկարի» 88-րդ մրցանակաբաշխության արարողության հեռուստաեթերի պրոդյուսերներ Դևիդ Հիլն ու Ռեջինալդ Հադլին:
Կատակերգու, դերասան, գրող, պրոդյուսեր, ռեժիսոր, վավերագրող` այս ամենը նրա մասին է: Նա «Օսկար» մրցանակաբաշխության բացառիկ հաղորդավար կլինի: Դերասանն, ով արդեն եղել է մրցանակաբաշխության 77-րդ արարողության հաղորդավարը, կրկին համաձայնել է այն վարել:
«Ես այնքան ուրախ եմ վարել «Օսկար» մրցանակաբաշխությունը: Վերադառնալը հիանալի է», — ասել է նա:
«Օսկար» մրցանակաբաշխությունը տեղի կունենա 2016 թվականի փետրվարի 28-ին Լոս Անջելեսում: Հավակնորդները կհայտարարվեն հունվարի 14-ին:
