ԵՐԵՎԱՆ, 20 հոկտեմբերի- Sputnik. «ՕՐ ԱՌԱՋԻՆ». Հոկտեմբերի 19-ին Արամ Խաչատրյանի անվան մեծ համերգասրահում մեկնարկեց «Վերադարձի» դասական երաժշտության 8-րդ փառատոնը:
Վահան Մարտիրոսյանի տպավորիչ ելույթին հաջորդեց տաղանդաշատ դաշնակահարուհի Սվետլանա Նավասարդյանի բեմելը: Այս անգամ «անուրանալի անհատականությունը», ինչպես նրան անվանում են երաժշտական աշխարհում, կատարեց Տիգրան Մանսուրյանի «Ֆանտազիան»: Մաեստրոն, հմայված հայուհու անզուգական կատարմամբ և լսելով իր ստեղծագործության ամենագեղեցիկ մատուցումներից մեկը, ելույթի ավարտից անմիջապես հետո բեմ բարձրացավ և գրկախառնվեց Նավասարդյանի հետ:
Մինչ օրս «Վերադարձը» հավատարիմ է հայազգի երաժիշտների հայրենադարձությանը նպաստելու իր առաքելությանը, դա է փաստում փառատոնի համահիմնադիր Մարիամ Շահինյանը՝ նշելով, որ տարեցտարի ավելանում է «վերադարձողների» թիվը. «Այժմ մենք ունենք բավականին հագեցած ցուցակ, որտեղ մեծ թվով հայազգի երաժիշտներ հերթի մեջ են և մեծ խանդավառությամբ են ընդունում մեր հրավերը»:
Սակայն կա ևս մեկ պատճառ, որը ստիպում է արտերկրում փայլող հայ երաժիշտներին վերադառնալ իրենց արմատներին. «Բեմելը արտերկրում այլ զգացողություն է, իսկ բեմելը Հայաստանում, հայրենիքում՝ մեկ այլ, սա «բացարձակ հաշվետվություն» է», — նկատեց Շահինյանը:
Այս տարվա փառատոնը կրկնակի իմաստավորված է, քանի որ նվիրվում է Հայոց ցեղասպանության 100-րդ տարելիցին: «Վերադարձի» 8-րդ փառատոնը նախորդներից կտարբերվի նաև յուրօրինակ նորամուծությամբ. հայ երիտասարդ դասականներից ու նրանց օտարազգի հասակակիցներից բաղկացած կվինտետը հանդես կգա «Վերադարձի» կվինտետ անվան տակ:
Փառատոնային միջոցառումների շարքը կտևի մինչև նոյեմբերի 7-ը, և համերգների ընթացքում հայ հանդիսատեսին կներկայացվեն դասական երաժշտության տարբեր ուղղություններ ու ժամանակաշրջաններ ընդգրկող ստեղծագործություններ: Փառատոնին մասնակցելու են հայ և այլազգի երաժիշտներ Հայաստանից, Ֆրանսիայից, Մեծ Բրիտանիայից, Ճապոնիայից և Բելգիայից:
Հաջորդ համերգը կկայանա հոկտեմբերի 24-ին` Կոմիտասի անվան կամերային երաժշտության տանը: Ֆրանսիայում ապրող և ստեղծագործող տաղանդաշատ ջութակահար և դիրիժոր Հայկ Դավթյանի շուրջ համախմբված «Նաիրի» լարային կվինտետը անվանի մեցցո սոպրանո Աննա Մայիլյանի հետ հանդես կգա Հայոց ցեղասպանության 100-րդ տարելիցին նվիրված հատուկ ծրագրով:
