ԵՐԵՎԱՆ, 20 հոկտեմբերի- Sputnik. Պետությունը պետք է աջակցի Հայաստանում գեղասահքի զարգացմանը, երեքշաբթի լրագրողներին ասաց օլիմպիական չեմպիոն, գեղասահքի աստղ Եվգենի Պլյուշչենկոն:
Անվանի ռուս գեղասահորդը ժամանել է Հայաստան` «Սառույցի արքաներ» չեմպիոնների սառցե շոուին մասնակցելու համար, որը տեղի կունենա Կարեն Դեմիրճյանի անվան մարզահամերգային համալիրում:
Նշելով, որ գեղասահքը ողջ աշխարհում ակտիվ զարգանում է և առաջ շարժվում, Պլյուշչենկոն ափսոսանք հայտնեց, որ Հայաստանում հարթակներ չկան գեղասահորդների համար:
«2008 թ. —ին մենք փորձեցինք բացել Եվգենի Պլյուշչենկոյի անվան դպրոց, և մեզ մոտ այդ գործընթացը սկսվեց: Մեզ խոստացան սառույց և հարթակ երեխաների համար: Բայց, ցավոք, եթե տարվա ընթացքում սառույց է տրամադրվում ընդամենը մեկ ամսով, ապա ոչ մի դպրոց չի կարող լինել, երեխաները չեն կարող սահել, և ոչ մի արդյունք չի լինի»,- նշեց գեղասահորդը:
Նա կարծում է, որ դրա համար պետք չեն հսկայական հարթակներ, այլ ընդամենը պետք են մարզական բազաներ և սահադաշտեր` նոր ուղղությունների զարգացման համար:
Շոուի հատուկ հյուրերը կլինեն երգիչներ Հայկոն և Վախթանգը: Շոուն սառցե ներկայացումների հայտնի պրոդյուսեր Արի Զաքարյանը ստեղծել է հատուկ Հայաստանի համար:
