Հանքավանով`անհայտություն կամ զգուշացեք`չխաբեն

ԵՐԵՎԱՆ, 20 հոկտեմբերի – Sputnik. Այսպիսի մի կտրոն մի օր հայտնվեց տիկին Ռոզայի ձեռքում, ու նա չգիտեր` ինչ անի դրա հետ: Պարզվեց, որ այդ կտրոնի համար պիտի վճարեր 600 դրամ: Երբ այդ անել հրաժարվեց, կտրոնը բերած անհասկանալի արտաքինով կինն անցավ վիրավորանքների ու գոռոցների: Բնականաբար, այդ կինը կորզեց անհրաժեշտ 600 դրամն ու իրենից գոհ հեռացավ:

Հեռախոսազանգն ու 600 դրամ սակագինը, հաստատ, շատերին շատ բան հիշեցրին: Չկա երևանյան մի բնակարան, որ այդպիսի զանգեր ստացած չլինի: Տարիներ առաջ մեզ հեռախոսով առաջարկում էին ամսագրեր գնել: Երբ դրանք այլևս չսպառվեցին, անունը դրեցին <<բարեգործություն>> ու այդ կերպ փորձեցին իրացվել: Հիմա, երբ այս տարբերակն էլ չի աշխատում, ուրիշ բան են մտածել:

Խոհարարական, մանկական, նորաձևության մասին գրքույկ-ամսագրերի տարատեսակ հրատարակիչների կողքին նոր անհատ ձեռնարկատերեր են հայտնվել: Հայտարարում են, թե իբր հեռախոսահամարը շահել է զեղչ Հայաստանյան որևէ հանգստյան տանը, բայց 600 դրամը ստանալուց հետո` դժվար է ասել`որտեղ կհայտնվի, օրինակ, Հանքավան ուղևորվող քաղաքացին:

Նախորդ օրը Ռոզա Աբրահամյանին էր զանգահարել բարեհամբույր ձայնով մի աղջիկ, ասել, թե իբր նրա հեռախոսահամարը շահել է: Շահումը Հանքավանի <<Հովիտ>> հանգստյան տանը 12000 դրամի փոխարեն 7800-ով հանգստանալու հնարավորությունն է, բայց դա միայն այն դեպքում, եթե կտրոնը գնի 600 դրամով: Երևանի բնակչուհին կտրոնը գնել չէր ցանկացել:

Իսկ կտրոնը շատ բան պարզեց: Կտրոնի ստորին հատվածում հեռախոսահամար կա` տրամադրողներինն է: Նեկայացա որպես հաճախորդ ու խնդրեցի տալ նշված` Հանքավանի  <<Հովիտ>> հանգստյան տան հեռախոսահամարը: Զանգիս պատասխանեց այդ հաստատության տնօրենը` Ալբերտ անունով: Պարզվեց` նշված հանգստյան տունը հիմա չի գործում` ջեռուցում չունի: Վերաբացվելու է միայն հաջորդ տարվա մայիսին: Սա այն դեպքում, երբ ուշադրություն` կտրոնի վրա նշված է` առաջարկն ուժի մեջ է մինչև 2016 թվականի հունիս: Այսինքն` գործնականում որևէ հաճախորդ այս կտրոնից օգտվել չի կարող: Կտրոնը քաղաքացիների վզին փաթաթողները պնդեցին, թե զգուշացրել են, որ հանգստայն տունը չի գործում: Համաձայնեք, չափազանց անտրամաբանական կլիներ, եթե մարդը 600 դրամով գներ մի բան` ոչ մի բանի համար:

Ինչևէ, որոնումներս հասցրին <<Լիլիթ Պետրոսյան>> ԱՁ: Լիլիթ Պետրոսյանն ինձ հետ զրույցում պնդեց, որ նշված հեռախոսահամարից կտրոն գնելու ցանկություն հայտնել են: Խոստովանեց, որ հեռախոսահամարն ու հասցեն էլ տվյալների իրենց բազայից են վերցրել, երբ նույն հասցեին ժամանակին ամսագրեր են առաքել: Խոստացավ նաև պատժել անպարկեշտ արտահայտություններով հաճախորդներին վիրավորող կտրոն բաժանող կնոջը:

Նկատենք, Քանաքեռ-Զեյթուն համայնքի նույն շենքում այդ օրը շահել էին բոլոր նրանց հեռախոսահամարներն, ովքեր ժամանակին դժբախտություն էին ունեցել կապ ունենալ հեռախոսաառևտրային այս ցանցի հետ: Համաձայնեք` վատ հնարք չէ մարդկանց գրավելու համար: Իսկական գերշահույթ: Մեկ կտրոնի տպագրությունն արժե առավելագույնը 10 դրամ:

Զանգահարողները պնդում են, որ աշխատում են օրինական դաշտում, ոստիկանության թույլտվությամբ, համապատասխան գրանցումներով և այլն: Գուցե համապատասխան մարմիններն իսկապես աշխատեն նրանց հետ:

Դիանա Մխիթարյան