ԵՐԵՎԱՆ, 16 հոկտեմբերի – Spuntik. Պաղեստինա-իսրայելական սահմանին տիրող իրավիճակը, մեղմ ասած, այնքան էլ հանգիստ չէ: Պաղեստինցի առաջնորդների և Իսրայելի կառավարության միջև ստեղծված լարված իրավիճակը մշտապես թեժանում է, և վերջին ամիսը նույնպես բացառություն չէ:
Sputnik Արմենիա պորտալը կապ է հաստատել «Նաիրի» հասարակական կազմակերպության նախագահ, Պետախ Տիկվայի հայերի միության ղեկավար, Իսրայելում գործող «Israelahayer» միակ հայկական թերթի գլխավոր խմբագիր Արտյոմ Չերնամորյանի հետ և ճշտել, թե ինչպես են հայերն իրենց զգում Իսրայելում, և արդյո՞ք նրանց վտանգ չի սպառնում:
«Տանից մենք դուրս ենք գալիս միայն անհրաժեշտության դեպքում` խանութ կամ աշխատանքի գնալու համար, երեխաներին միայն մանկապարտեզ ու դպրոց ենք տանում: Ոչ մի ժամանցային ծրագիր չունենք», — ասաց նա:
Նրա խոսքով` ամենաանկայուն իրավիճակն այսօր Երուսաղեմի Հին քաղաքում է, այնտեղ, որտեղ մեծ հայկական համայնք կա:
«Իսրայելի հայերին կարելի է երեք խմբի բաժանել: Առաջին խմբում այն հայերն են, ովքեր հազարամյակներ շարունակ ապրում են Իսրայելում, երկրորդ խմբում այն հայերն են, ովքեր այստեղ են տեղափոխվել Հայոց ցեղասպանությունից հետո, իսկ երրորդը` ովքեր 90-ական թվականներից սկսած կացության իրավունք են ստացել Իսրայելում», — ասաց Չերնամորյանը:
Նա նշեց, որ երրորդ խմբի ներկայացուցիչներն ապրում են քաղաքի կենտրոնում և, ինչպես բոլոր մյուս քաղաքացիները, երբեք չգիտեն՝ ինչ կարող է տեղի ունենալ հաջորդ վայրկյանին:
«Կարող է դանակով զինված ահաբեկիչ մոտենալ և միանգամից տեղում սպանել…», — խոստովանեց Չերնամորյանը:
Նրա խոսքով` Պետախ Տիկվայում հոկտեմբերի 7-ին «Հայոց երկրի երաժշտությունը» խորագրով համերգ է կազմակերպվել, որի ընթացքում քաղաքապետը մի քանի քաղաքացիների պատվոգրեր է շնորհել Պետախ Տիկվայում հասարակական կազմակերպություն ստեղծելու և հայ համայնք ձևավորելու համար:
Նա ավելացրեց, որ նույնիսկ այդ օրը դանակով զինված մի արաբ հարձակվել է կանգառում կանգնած մարդկանց վրա:
«Այսինքն, ոչ ոք ապահովագրված չէ պատահական հարձակումից», — ավելացրեց նա:
Ընդ որում, Չերնամորյանն ընդգծեց, որ թեև երկրում լարված իրավիճակ է, այնուհանդերձ համայնքի հայերը ոչ մի խնդիր չունեն:
«Առաջինը` Երուսաղեմի Հին քաղաքում հայերը ստատուս-քվոյի կարգավիճակ ունեն, քանի որ սա մեր պատերազմը չէ: Սա պաղեստինա-իսրայելական հակամարտություն է», — ընդգծեց նա:
Չերնամորյանը նշեց, որ Երուսաղեմի Հայոց պատրիարքությունը և Երուսաղեմի հայերի պաշտոնական դիրքորոշումը այն է, որ Իսրայելի հայերը երբեք ոչ մի կողմին չեն սատարում:
«Ահաբեկիչների համար տարբերություն չկա՝ ուր են նրանք կրակում,և ում են սպանում` հայերին, արաբներին, թե հրեաներին: Կարևորն այն է, որ մեր թիկունքն աշխարհի ամենահզոր բանակներից մեկն է պաշտպանում: Իսկ Իսրայելի բանակը ճիշտ է գործում, և արդյունքն ակնհայտ է: Վերջին երկու օրերին համեմատաբար հանգիստ է, քան երեք-չորս օր առաջ: Զենք կրելու իրավունք կա, ինքնապաշտպանության կանոններ կան: Ոստիկանությունը նաև ցերեկն է զենքով շրջում քաղաքում», — ընդգծեց Չերնամորյանը:
Խոսելով Հայաստան տեղափոխվելու հնարավորության մասին՝ նա նշեց, որ իր ծանոթ հայերից ոչ մեկն առայժմ պատմական հայրենիք վերադառնալ չի պատրաստվում, թեև Հայաստանում ապրող բարեկամները նրանց հորդորում են վերադառնալ:
Հայաստանի հրեական համայնքի նախագահ Ռիմա Վարժապետյան-Ֆելլերն իր հերթին նշեց, որ հնարավոր չէ ընտելանալ կամ ըմբռնումով մոտենալ այս իրավիճակին:
«Ես ամենօրյա կապի մեջ եմ Իսրայելի հայ համայնքի հետ, և նրանցից ոչ ոք այս գործողությունների համար Իսրայելին չի մեղադրում, քանի որ ահաբեկությանը ոչ մի արդարացում չկա», — ասաց Վարժապետյան-Ֆելլերը:
Նա նշեց, որ Իսրայելի հայ համայնքին շատ է մտահոգում պաղեստինա-իսրայելական սահմանին տիրող լարված իրավիճակը, սակայն բոլորը շարունակում են աշխատանքի գնալ, օգտվել հասարակական տրանսպորտից:
«Իսկ ի՞նչ անեն: Կյանքը շարունակվում է: Ոչ ոք արտահերթ արձակուրդ չի տալիս, որպեսզի մարդիկ անվտանգության նկատառումներից ելնելով տանը նստեն», — ասաց Վարժապետյան-Ֆելլերը:
