Փորձագետ. Հայաստանն ԱՊՀ գագաթնաժողովում կբարձրացնի Ղարաբաղի իրավիճակի մասին հարցը

ԵՐԵՎԱՆ, 15 հոկտեմբերի– Sputnik. Հայաստանն Աստանայում կայանալիք ԱՊՀ գագաթնաժողովում կբարձրացնի ղարաբաղյան հակամարտության շրջանում լարվածության աճի հարցը, Sputnik Արմենիա պորտալին ասաց Սորբոնի համալսարանի քաղաքագիտության համալսարանի դոկտոր Հայկ Մարտիրոսյանը։

Աստանայում ԱՊՀ երկրների ղեկավարների խորհրդի և Եվրասիական տնտեսական գերագույն խորհրդի նիստերին կմասնակցեն Հայաստանի նախագահ Սերժ Սարգսյանը և ՀՀ ԱԳՆ ղեկավար Էդվարդ Նալբանդյանը։

«Հայաստանը, իհարկե, կբարձրացնի Ղարաբաղում իրավիճակի սրման հարցը, մենք տեսնում ենք, որ նման հավաքներին նախագահը դա անում է։ Հայաստանը բողոք կհայտնի, կփորձի ուշադրություն գրավել այդ խնդրի նկատմամբ»,– կարծում է Մարտիրոսյանը։

Քաղաքագետի խոսքով` նախկինում նման հանդիպումները չեն հանգեցրել լուրջ հետևանքների, և հիմա չարժե զգալի փոփոխությունների սպասել։

Քաղաքագետի խոսքով` Աստանայում գագաթնաժողովի շրջանակում հիմնական շեշտը կդրվի Մերձավոր Արևելքում իրավիճակի վրա։ «Հնարավոր է` Ռուսաստանը փորձի հիմքեր ստեղծել` սիրիական հակամարտությունում ՀԱՊԿ և ԱՊՀ անդամ երկրների թե՛ քաղաքական, թե՛ ռազմական որոշակի ներգրավվածություն ապահովելու համար։ Նաև կփորձի առավելագույն կերպով ակտիվացնել Միջին Ասիայում ՀԱՊԿ հնարավորությունները»,– ասել է Մարտիրոսյանը։

Նրա խոսքով` տեղեկատվություն է հայտնվել, որ Սիրիայում առկա են զորքեր նույնիսկ Կուբայից։ «Դժվար է ասել այդ տեղեկատվության իրազեկության մասին, սակայն, ամենայն հավանականությամբ, ինչ–որ նվազագույն մասնակցություն գոյություն ունի։ Այդ օրինակով Ռուսաստանը կփորձի հնարավորինս մեծ կոալիցիա ստեղծել` իր պայքարին մեծ կշիռ հաղորդելու համար»,– ասել է քաղաքագետը։

Սիրիայում 2011 թ.–ի մարտից շարունակվում է զինված հակամարտությունը, որի հետևանքով, ՄԱԿ–ի տվյալներով, զոհվել է ավելի քան 250 հազար մարդ։ Կառավարական զորքերը դիմակայում են գրոհայինների ջոկատներին, որոնք պատկանում են տարբեր զինված զորամիավորումների։

Սեպտեմբերի 30–ից Ռուսաստանը, նախագահ Բաշար Ասադի խնդրանքով, սկսել է կետային ավիահարվածներ հասցնել Սիրիայում «Իսլամական պետության» օբյեկտներին։