ԵՐԵՎԱՆ, 15 հոկտեմբերի– Sputnik. Սահմանադրական փոփոխությունների գործընթացը շատ հետաքրքիր բացահայտումներ արեց: Քաղաքական որոշ ուժեր սկսել են կողմ արտահայտվել սահմանադրական փոփոխություններին՝ հաշվի առնելով քաղաքական և կուսակցական նեղ շահերը, Sputnik Արմենիա ռադիոկայանի հետ զրույցում նման տեսակետ հայտնեց քաղաքական վերլուծաբան Մովսես Դեմիրճյանը:
«Մինչ այդ ընդդիմադիր շատ գործիչներ ասում էին, թե Հայաստանի խնդիրները համակարգային բնույթ ունեն, բայց չգիտես ինչու չէին խոսում այն մասին, որ սահմանադրությունն այն համակարգերից մեկն է, որը փոխելով` հնարավոր է նաև խնդիրները փոխել: Հետո, երբ իշխանությունը նախաձեռնեց սահմանադրական փոփոխությունները, նրանք կարծես մոռացան համակարգային խնդիրների և համակարգային լուծումների մասին և սկսեցին իշխանությանը մեղադրել վերարտադրվելու նոր մեխանիզմ հորինելու համար»,- ասել է նա:
Այնուհետև, ինչպես նկատում է Դեմիրճյանը, որոշ ժամանակ անց մի շարք կուսակցություններ հասկացան, որ նոր սահմանադրությունն Ազգային ժողովում իրենց ավելի շատ լիազորություններ է տալիս և սկսեցին կողմ արտահայտվել այդ փոփոխություններին:
«Ես ենթադրում եմ, որ կառավարման խորհրդարանական համակարգին նրանք սկսել են կողմ արտահայտվել՝ նկատի ունենալով նեղ քաղաքական, կուսակցական շահերը, այլ ոչ թե այն, որ ավելի մեծ մասնակցություն են ունենալու երկրի կառավարմանը: Սա պատիվ չի բերում մեր կուսակցություններին, որովհետև նրանք կարծես առաջին հերթին լուծում են ԱԺ-ում իրենց ներկայացված լինելու խնդիրը, իսկ պետության կառավարման հարցերը թողնում են երկրորդ պլանում»,-ընդգծել է բանախոսը:
Քաղաքական վերլուծաբանը նկատում է նաև, որ այդ քաղաքական ուժերը չեն քննարկում նաև այն հարցը, թե որքանով է ճիշտ անցնել հարյուր տոկոսանոց համամասնական ընտրակարգին:
«Չեն քննարկում այդ հարցն անգամ այն դեպքում, երբ համամասնական ընտրական համակարգին դեմ կարելի է բերել մի շարք հիմնավոր փաստարկներ, ինչից ենթադրում եմ, որ նրանք սահմանադրության մեջ տեսել են մեկ-երկու փոփոխություն, որոնք թույլ են տալիս ավելի դյուրին և լայնորեն ներկայացված լինել ԱԺ-ում և աչք են փակում սահմանադրության մյուս փոփոխությունների վրա»,-կարծիք է հայտնել Մովսես Դեմիրճյանը:
Դեմիրճյան. Քաղաքական որոշ ուժեր կողմ են սահմանադրական բարեփոխումներին՝ կուսակցական նեղ շահերից ելնելով
17:47 15.10.2015 (Թարմացված է: 17:51 15.10.2015)
Բաժանորդագրվել
Քաղաքական վերլուծաբանը նկատում է, որ այդ քաղաքական ուժերը չեն քննարկում նաև այն հարցը, թե որքանով է ճիշտ անցնել հարյուր տոկոսանոց համամասնական ընտրակարգին
