Փորձագետ. Ռուսաստանը նախազգուշացրել է Թուրքիային իսլամիստներին աջակցելու համար

ԵՐԵՎԱՆ, 15 հոկտեմբերի– Sputnik. Ռուսաստանը զգուշացրել է Թուրքիային, որպեսզի վերջինս հրաժարվի Սիրիայի արմատական իսլամիստներին աջակցելուց, Sputnik Արմենիա պորտալին ասաց թուրքագետ Անդրանիկ Իսպիրյանը։

«Սիրիայում Ռուսաստանի հանկարծակի հայտնվելու և նրա ակտիվ ռազմական գործողությունների արդյունքում Թուրքիան հայտնվեց բավականին բարդ իրավիճակում։ Թուրքիան, որը հակամարտության սկզբից հետո այս բոլոր տարիների ընթացքում, փորձելով լինել կարևորագույն դերակատար, մարզելով գրոհայինների և օգնելով նրանց, փորձելով տապալել Ասադին, հանկարծ բախվեց Ռուսաստանի ներկայության հետ։ Նման իրավիճակում Թուրքիայի ողջ քաղաքականությունը ձախողվեց», – ասաց Իսպիրյանը։

Նրա խոսքով` Ռուսաստանը շատ լավ գիտի, որ Թուրքիան աջակցում է տարբեր իսլամամետ խմբավորումներին, այդ թվում` ահաբեկիչներին։ «Ռուսաստանի վերջին գործողությունները, օդային տարածքի խախտումները վկայում են այն մասին, որ ՌԴ–ն Թուրքիային է ուղղել անուղղակի զգուշացում այն մասին, որ այսուհետ ամեն ինչ վերահսկվելու է, և Ռուսաստանն այլևս թույլ չի տա հովանավորել արմատական իսլամիստներին», – նշեց Իսպիրյանը։

ՆԱՏՕ–ն պնդում է, որ Սու–30 և Սու–24 ռուսական ինքնաթիռները խախտել են Թուրքիայի օդային տարածքը հոկտեմբերի 3–ին և 4–ին` չնայած թուրքական իշխանությունների զգուշացումներին։ ՌԴ ՊՆ–ն երկուշաբթի հայտարարել է, որ հոկտեմբերի 3–ին Սու–30 ռուսական ինքնաթիռը կարճ ժամանակով, մի քանի վայրկյանով, մուտք է գործել Թուրքիայի օդային տարածք` անբարենպաստ եղանակային պայմանների պատճառով։

Իսպիրյանի խոսքով` չնայած դրան, Թուրքիան անուղղակիորեն կփորձի շարունակել իսլամիստներին աջակցելու իր քաղաքականությունը, սակայն այս անգամ շատ զգուշությամբ, քանի որ  Ռուսաստանը ներկայացրել է Սիրիայում ներկայության բավականին լուրջ հայտ։

Սիրիայում 2011 թ.–ի մարտից շարունակվում է զինված հակամարտությունը, որի հետևանքով, ՄԱԿ–ի տվյալներով, զոհվել է ավելի քան 250 հազար մարդ։ Կառավարական զորքերը դիմակայում են գրոհայինների ջոկատներին, որոնք պատկանում են տարբեր զինված զորամիավորումների։

Առավել ակտիվ են «Իսլամական պետություն» և «Ջեբհաթ ան–Նուսրա» ծայրահեղական խմբավորումների գրոհայինները։ Սեպտեմբերի 30–ից Ռուսաստանը, Սիրիայի նախագահ Բաշար Ասադի խնդրանքով, սկսել է թիրախային ավիահարվածներ հասցնել Սիրիայում գտնվող «Իսլամական պետության» օբյեկտներին։

Այս ընթացքում Օդա–տիեզերական ուժերը հասցրել են ավելի քան 450 հարված` ոչնչացնելով մոտ 300 գրոհային, մարզական ճամբարներ, հրամանատարային կետեր, ռազմամթերքի պահեստներ ու այլ օբյեկտներ։ Բացի այդ, Կասպյան նավատորմի նավերն արձակել են 26 հրթիռ, որոնք հաջող կերպով խոցել են ԻՊ–ի օբյեկտները։