«Նոր Հայաստան» շարժումը ՌԴ ազգային փոքրամասնություններին կոչ է անում օգնել սիրիացիներին

ԵՐԵՎԱՆ, 15 հոկտեմբերի – Sputnik. «Նոր Հայաստան» միջազգային շարժումն իր օժանդակությունն է առաջարկել Ռուսաստանի ԱԻՆ–ին Սիրիա ուղղվող մարդասիրական 13-րդ և հետագա օգնության ձևավորման գործում և Ռուսաստանում գտնվող մյուս ազգային համայնքներին ու սփյուռքին կոչ է արել միանալ Սիրիայի տարածքում ռազմական գործողությունների հետևանքով տուժած սիրիացիներին օգնություն տրամադրելու գործին։

«ՆՀ» նախագահ Ամրամ Պետրոսյանն արդեն Ռուսաստանի ԱԻՆ ղեկավարի անունով դիմում է ուղարկել և խնդրել է Սիրիայի համար նախատեսված մարդասիրական օգնության ձևավորման հարցում «ուսումնասիրել «Նոր Հայաստան» շարժման ռեսուրսների ներգրավման հնարավորությունը։Առաջին հերթին, խոսքը սննդի, դեղորայքի և հագուստի մասին է, նշվում է Պետրոսյանի նամակում։

Ավելի վաղ շարժումն արդեն հայտարարել էր հակաահաբեկչական պայքարի ակտիվացման մասին և կոչ արել ամբողջ աշխարհի հայ համայնքներին միավորել ջանքերը Սիրիայի բնակչությանը մարդասիրական օգնություն ցուցաբերելու համար, նշվում է ԱԻՆ ղեկավարին ուղղված նամակում։

«Միաժամանակ, «ՆՀ» միջազգային շարժման հայ մասնակից–համայնքների ներկայացուցիչները դիմել են ՄԱԿ–ի գլխավոր քարտուղարին Պան Գի Մունին` կոչ անելով «Իսլամական պետություն» խմբավորումը ներառել միջազգային ահաբեկչական և ծայրահեղական կազմակերպությունների ցանկում և դա ամրագրել ՄԱԿ–ի ԳՎ–ի բանաձևով», – գրված է նամակում։

Հինգշաբթի շարժման նախագահը նամակներ կուղղի 8 միավորումների ղեկավարներին, որոնց կոչ կանի միանալ մարդասիրական առաքելությանը։ Այդ միավորումների ցանկում կլինեն «Ռուսաստանի հայերի միությունը», «Ռուսաստանում վրացիների միությունը», հրեական ազգային–մշակութային դաշնային ինքնիշխանությունը, «Ռուսաստանի ուկրաինացիներ» կազմակերպությունը,  Ռուսաստանի ղազախների, բելառուսների, ադրբեջանցիների, քրդերի ազգային–մշակութային դաշնային ինքնավարությունը։

Ինչպես նշվում է հաղորդագրության տեքստում, «ՆՀ»–ն աջակցում է Սիրիայում Ռուսաստանի գործողություններին, որոնք ուղղված են «Իսլամական պետության» դեմ պայքարին։ Սակայն, ինչպես կարծում են շարժման ներկայացուցիչները, «հասարակ հավանությունը միայն բավարար չէ»` այս հարցի վերաբերյալ բոլոր հասարակական միավորումների կողմից հստակ քաղաքացիական դիրքորոշում է անհրաժեշտ։

««ՆՀ» միջազգային շարժումը, որն իր շարքերում է միավորում ողջ աշխարհի հայ համայնքների ներկայացուցիչներին, միացել է մարդասիրական նախագծերին և զբաղվում է Սիրիայի ժողովրդի համար օգնություն հավաքելով, կամավորների խմբեր է ձևավորում այդ երկիր ուղարկելու համար։ Մենք հորդորում ենք, որ դուք ավելի ակտիվ լինեք և միանաք այս գործընթացին», – ասվում է ուղերձում։