Փորձագետ. բարեփոխված Սահմանադրությունը կպահպանի գործող Սահմանադրության թերությունները

ԵՐԵՎԱՆ, 14 հոկտեմբերի – Sputnik. Նոր Սահմանադրությունն, ըստ էության, ներառում է այն նույն թերությունները, որոնք ունի նաև գործող Հիմնական օրենքը, հայտնել է Երևանի աշխարհաքաղաքական ակումբի ղեկավար Արման Բոշյանը։

«Մենք կառաջարկեինք չանցկացնել սահմանադրական բարեփոխումներ, այլ մշակել նոր Սահմանադրություն։ Ներկա պահին Հայաստանը, փաստացի, չունի սեփական պետական գաղափարախոսություն», – չորեքշաբթի մամուլի ասուլիսում ասել է Բոշյանը։

Նրա խոսքերով` Սահմանադրությունը` որպես երկրի Օրենքների օրենք, պետք է ընդգրկի «ազգ», «Հայրենիք» և «պետություն» հասկացությունները։ «Նոր սահմանադրության մեջ չկա գլխավոր հրամանատարի դերի հստակեցում, ինչը չափազանց կարևոր է` հաշվի առնելով, որ Հայաստանը գտնվում է պատերազմական իրավիճակում, և այս իրավիճակը կպահպանվի ևս հիսուն տարի», – կարծում է Բոշյանը։

Նա միաժամանակ թվարկեց նաև դրական փոփոխությունները, մասնավորապես, Հայաստանի ընդերքի և ջրային պաշարների ազգայնացման հեռանկարները։ «Բացի այդ, նախատեսված է հնարավորություն` հավաքելով 50 հազար ստորագրություն, Ազգային Ժողովի քննարկմանը դնել նոր օրենքի նախագիծը։ Եթե պատասխանը բացասական լինի, ապա 300 հազար ստորագրության առկայության դեպքում նախագիծը կարելի է հանրաքվեի դնել», – ասել է Բոշյանը։

«Լույս» տեղեկատվական-վերլուծական կենտրոնի ղեկավար Հայկ Այվազյանն իր հերթին նշել է, որ Սահմանադրության նախագծում կան հոդվածներ, որոնք վտանգ են ներկայացնում երկրի, արժեհամակարգի և ընտանիքի ինստիտուտի համար։

«Մենք հանդես եկանք առաջարկով, որոնցից ոմանք ընդունվեցին։ Այնուամենայնիվ, ընդհանուր առմամբ ստացվում է, որ Հայաստանը կզրկվի քաղաքական և տնտեսական ինքնիշխանությունից։ Նկատվում է մեկ այլ վտանգավոր միտում` հասարակության պառակտում երկու մասի` «այո» և «ոչ», – ասել է Այվազյանը։

Նրա խոսքերով` հաշվի առնելով տարածաշրջանում, ինչպես նաև Հայաստանում առկա լարված իրավիճակը` այն ապակայունացնելու փորձերն անթույլատրելի են։

Հայաստանի նախագահ Սերժ Սարգսյանի ստորագրած հրամանի համաձայն` սահմանադրական բարեփոխումների հանրաքվեն կանցկացվի դեկտեմբերի 6-ին։ Հայաստանի ԱԺ պատգամավորներն ընթացիկ տարվա հոկտեմբերի 5-ին կողմ քվեարկեցին սահմանադրական բարեփոխումների նախագծին, որը փաստացի նախատեսում  է անցում կատարել խորհրդարանական կառավարման կարգի։