Կենսաբանները կարողացել են անջատել ծերության գեները

ԵՐԵՎԱՆ, 13 հոկտեմբերի– Spuntik. Գիտնականները մի խումբ գեներ են հայտնաբերել, որոնց հեռացումը կարող է կյանքի տևողության կտրուկ ավելացման հանգեցնել, հաղորդում է lenta.ru–ն։ Ավելի քան 10 տարի տևած հետազոտության արդյունքները խոշոր առաջընթաց կլինեն գենետիկայում։ Իրենց աշխատանքի արդյունքների մասին հեղինակները պատմել են Cell Metabolism ամսագրին։ Այդ արդյունքներին կարելի է հակիրճ ծանոթանալ Independent հրատարակության կայքում։

Սիեթլում գտնվող Վաշինգտոնի համալսարանի և Բակի անվան ծերության ուսումնասիրության ինստիտուտի գիտնականներն իրենց աշխատանքի արդյունքում Saccharomyces cerevisiae տեսակի սնկերի մոտ հայտնաբերել են 238 գեն, որոնք հեռացնելու դեպքում ավելանում է կյանքի տևողությունը։ Մասնագետներն ուսումնասիրել են սնկերի 4698 շտամ, յուրաքանչյուրի մոտ նրանք անջատել են մեկական գեն։ Գենետիկներին հաջողվել է ուսումնասիրել օրգանիզմի ծերացման դանդաղման ընթացքը` հետևելով շարժական ռիբոնուկլեինային թթուների ակտիվությանը։

Հետազոտված գեների մոտավորապես կեսն առկա են կաթնասունների, այդ թվում մարդու մոտ։ Գիտնականները հուսով են, որ ապագայում նրանց կհաջողվի ստեղծել դեղամիջոց, որը թույլ կտա ճնշել որոշակի գեների աշխատանքն ու երկարացնել կյանքը։ Այժմ գենետիկներն ուսումնասիրում են բացահայտված 238 գեների և մյուս գեների փոխկապակցությունը, ինչպես նաև` դրանց նշանակությունը կաթնասունների համար։