Բրիտանիան լավագույն երկիրն է մահանալու համար

ԵՐԵՎԱՆ, 13 հոկտեմբերի– Spuntik. Մեծ Բրիտանիան զբաղեցրել է առաջին տեղն այն երկրների վարկանիշում, որտեղ ստեղծվել են լավագույն պայմանները մահանալու համար։ Վարկանիշը երկրորդ անգամ կազմում է Economist Intelligence Unit (EIU) բրիտանական ընկերությունը։ Ինչպես հաղորդում է Lenta.ru–ն, հղում անելով Huffington Post–ին, խոսքը ծերերի նկատմամբ հոգ տանելու մակարդակի մասին է։

Ցանկում ընդհանուր առմամբ ներառվել է 80 պետություն։ Վարկանիշի հեղինակները հաշվի են առել հինգ կատեգորիա` բժշկական օգնության, պալիատիվ օգնության (որն ուղղված է հիվանդի կյանքի որակի լավացմանը, հիվանդի վիճակի ժամանակավոր թեթևացում) մակարդակն ու այլ գործոններ։

Մահվան որակի վարկանիշում առաջատար դիրքեր են զբաղեցրել Եվրոպայի, Հյուսիսային Ամերիկայի և Ասիական–խաղաղօվկիանոսյան տարածաշրջանի երկրները։ Հնգյակում ներառվել են Ավստրալիան, Նոր Զելանդիան, Իռլանդիան և Բելգիան։ Ասիական երկրների շրջանում առաջինը Թայվանն է, որն ընդհանուր ցանկում զբաղեցնում էր 6–րդ տեղը։ Ռուսաստանը հայտնվել է 48–րդ հորիզոնականում։ Այն առաջ է անցել Ուգանդայից, Պանամայից, Կոստա Ռիկայից, Չիլիից։ Վարկանիշի վերջին հորիզոնականը զբաղեցրել է Իրաքը։

Հետազոտողները նշել են, որ մասնագետները պետք է ուշադրություն դարձնեն բժշկական օգնության զարգացմանը, որն ուղղված է բնակչության խրոնիկ հիվանդությունների բուժմանը և ստեղծեն պալիատիվ օգնության զարգացած համակարգեր։