Նալբանդյան. Հայաստանը ողջունում է ԵՄ–ի կողմից ԵՀ-ին մանդատի տրամադրումը

ԵՐԵՎԱՆ, 13 հոկտեմբերի– Sputnik. Պաշտոնական Երևանը կարևորում է Եվրոպական Միության խորհրդի կողմից Հայաստանի հետ հարաբերությունների նոր իրավական հիմքի ձևավորման շուրջ բանակցություններ սկսելու վերաբերյալ Եվրոպական Հանձնաժողովին մանդատի տրամադրումը, հայտարարել է Հայաստանի ԱԳՆ ղեկավար Էդվարդ Նալբանդյանը:

«Լիահույս ենք, որ բանակցությունների արդյունքում մշակված փաստաթուղթը լավագույնս կարտահայտի Հայաստան-Եվրոպական Միություն փոխշահավետ համագործակցության խորությունը, կարտացոլի հարաբերությունները նոր մակարդակի բարձրացնելու համատեղ հանձնառությունը ու կուրվագծի փոխադարձ հետաքրքրություն ներկայացնող բոլոր ոլորտներում համապարփակ փոխգործակցությունը»,– ասել է Նալբանդյանը։

Շուրջ երկու տարի առաջ ծրագրվել է, որ Երևանը և Եվրամիությունը ասոցացման և ազատ առևտրի գոտու մասին համաձայնագիր կստորագրեն 2013թ.–ի նոյեմբերին Վիլնյուսում «Արևելյան գործընկերության» գագաթնաժողովում։

Սակայն 2013թ.–ի սեպտեմբերին Հայաստանը հայտարարեց, որ Մաքսային միության անդամ է դառնում և մասնակցելու է Եվրասիական տնտեսական միության ձևավորման գործին։