Քաղաքագետ. Թուրքիայի ազգային գաղափարախոսությունը Հայոց ցեղասպանության նախօրեին և այսօր նույնն են

ԵՐԵՎԱՆ, 13 հոկտեմբերի – Sputnik. Թուրքիան չի փոխել իր ազգային և պետական գաղափարախոսությունը և դժվար թե առաջիկայում փոխի: Այսինքն` ինչ գաղափարախոսություն այն ուներ Հայոց ցեղասպանության նախօրեին, նույն գաղափարախոսությունն ունի այսօր: Ինչպես «Sputnik-Արմենիա» ռադիոկայանի հետ զրույցում նկատել է քաղաքագիտության դոկտոր Հայկ Մարտիրոսյանը:

Նրա կարծիքով` այդ գաղափարախոսությունն այսօր, գուցե, գործում է մի փոքր տարբերությամբ՝ «թուրքական կայսրության» տեսությունը փոխարինվել է «թուրքական գերտերության ազդեցության» տեսության:

«Այս Թուրքիան մնում է նույնը, սակայն ոչ թե գավառական ձևակերպմամբ, ինչպես հաճախ ասում են՝  «թուրքը մնում է թուրք», այլ իրականում դա այդպես է»,-համոզմունք է հայտնել բանախոսը:

Քաղաքագետի խոսքով՝ հաճախ քաղաքականության մեջ և, ընդհանրապես, կյանքում շատ երևույթներ շատ ավելի պարզ են, քան պատկերացնում ենք. այլ գույներ չկան, կան այլ երանգներ, բայց գույները մնացել են նույնը:

«Թուրքիան, հատկապես նախագահ Էրդողանի իշխանության տարիներին, ձգտում է վերականգնել իր գերտերության կարգավիճակը, որը կորցրել է հարյուր տարի առաջ, և այդ ճանապարհին ապակայունացվում են գրեթե բոլոր հարևան երկրները: Ապակայունացվում է, վստահ եմ, գիտակցաբար: Իմ խորհին համոզմամբ՝ որևէ մեծ փոփոխություն տեղի չի ունեցել ոչ թուրքական մոտեցման, ոչ քաղաքականության, ոչ էլ ազգային գաղափարախոսության մեջ»,-ասել է նա:

Մարտիրոսյանը չի հերքում, որ Թուրքիայի ներսում կան գաղափարական պառակտումներ: Նրա խոսքով՝ թուրքական հասարակության մի փոքր հատվածը, բավական առաջադեմ է:

«Արևմտյան արժեքներով մեծացած և դրանցով ազդված երիտասարդներ կան, բայց նրանք լուրջ փոքրամասնություն են: Մեծամասնությունը, գրեթե, որևէ առումով չի կրել մենտալիտետի փոփոխություն», — նկատել է նա:

Թուրքիայում այսօր տեղի ունեցող բազում իրադարձություններ, ըստ քաղաքագետի, հակատրամաբանական և անտրամաբանական են, հետևաբար՝ վերլուծել որևէ իրողություն տրամաբանության տեսանկյունից, բավական դժվար է:

«Ապակայունացնելով երկիրը, այնուամենայնիվ, նրանք ոչ միայն չեն ունենում խնդիրների վերջնական լուծում, այլ դրանք կարող են վատ ավարտվել անգամ ապակայունացնող ուժերի համար: Հետևաբար՝ երկրի ներսում կատարվող շատ երեւույթներ անտրամաբանական են: Իշխող վերնախավի քայլերի տրամաբանությունը հետևյալն է. հասնել լիակատար վերահսկողության խորհրդարանում, փոխել կառավարման խորհրդարանական համակարգը և գործող նախագահին պահել իր պաշտոնին՝ նրան շնորհելով հզոր լծակները», — մեկնաբանել է Հայկ Մարտիրոսյանը:

Թուրքիան վերջին հիսուն տարիներին գտնվում է աննախադեպ ապակայունացման փուլում և որևէ կերպ չի կայունանում, այլ հակառակը՝ ավելի և ավելի է խորանում քաոսի մեջ:  Քաղաքագետը հավելում է՝ ահաբեկչության զոհերի թիվը, պայթունների հաճախականությունն ու ծավալներն ավելի շատ  աճում են, քան նվազում: