ԵՐԵՎԱՆ, 13 հոկտեմբերի – Sputnik. Երևանում ավարտվել է հոկտեմբերի 7-11-ը տեղի ունեցած շախմատի համալսարանական թիմերի Եվրոպայի առաջնությունը, հայտնում է կրթության և գիտության նախարարության պաշտոնական կայքը:
Ըստ հաղորդագրության` պարգևատրման հանդիսավոր արարողությանը ներկա է եղել ՀՀ կրթության և գիտության նախարար Արմեն Աշոտյանը: Ամփոփելով քառօրյա մրցաշարը՝ ՀՀ ԿԳ նախարարը կարևորել է երևանյան առաջնության կայացումը.
«Սա Հայաստանի նախաձեռնությունն էր` անցկացնել Եվրոպական համալսարանական շախմատի առաջին առաջնությունը: Իհարկե, հավակնոտ նախաձեռնություն էր` հաշվի առնելով, որ մենք բոլորովին վերջերս ենք անդամակցում Եվրոպական համալսարանական մարզական ասոցիացիային: Բայց միանգամից հանդես եկանք մեր առաջարկով: Ի ուրախություն մեզ, առաջարկությունն ընդունվել էր: Շախմատը Հայաստանի ազգային հպարտության բնութագրիչներից մեկն է: Պետք է փաստենք, որ առաջնությունը կայացել է: Դրա մասին խոսում է Եվրոպական համալսարանական մարզական ֆեդերացիայի ղեկավարությունը: Մեր թիմերն առաջին տեղում չեն, իհարկե այդ տեսակետից բավարարված չեմ, բայց ունենք երկրորդ մրցանակային տեղ»,- ողջույնի խոսքում նշել է Աշոտյանը։
Նա համոզմունք է հայտնել, որ մասնակիցները Հայաստանում անցկացրել են հրաշալի օրեր, ձեռք են բերել լավ ընկերներ:
ՀՀ ԿԳ նախարարը պարգևատրել է թիմային պայքարում հաղթած մասնակիցներին:
Տղաների թիմային պայքարում առաջին տեղը գրավել է Ռուսաստանի Ուրալի պետական համալսարանի թիմը, երկրորդ տեղում՝ Հայաստանի Ֆիզիկական կուլտուրային հայկական պետական ինստիտուտի թիմը և երրորդ տեղում՝ Լեհաստանի՝ Վարշավայի պետական համալսարանի թիմը:
Մրցաշարին մասնակցել են 9 երկրի 25 համալսարանական թիմեր, ընդհանուր առմամբ 82 պատվիրակներ, որոնցից 67-ը մարզիկներ:
Շախմատի համալսարանական թիմերի Եվրոպայի հաջորդ առաջնությունը տեղի կունենա 2 տարի անց՝ Իսպանիայում:
Երևանում պարգևատրվեցին շախմատի համալսարանական թիմերի Եվրոպայի առաջնության հաղթողները
09:09 13.10.2015 (Թարմացված է: 09:34 13.10.2015)
© Chessdom
Բաժանորդագրվել
Տղաների թիմային պայքարում առաջին տեղը գրավել է Ռուսաստանի Ուրալի պետական համալսարանի թիմը
