ԵՐԵՎԱՆ, 9 հոկտեմբերի – Sputnik. ՀՀ նախագահ Սերժ Սարգսյանին այսօր իր հավատարմագրերն է հանձնել Հայաստանի Հանրապետությունում Իրանի Իսլամական Հանրապետության արտակարգ և լիազոր դեսպան Սեյեդ Քազեմ Սաջադին, հայտնում է ՀՀ նախագահի մամուլի ծառայությունը:
Հաղորդագրության համաձայն` հանրապետության նախագահը շնորհավորել է դեսպանին մեր երկրում դիվանագիտական առաքելությունն սկսելու կապակցությամբ և մաղթել հաջողություններ:
Սերժ Սարգսյանը բարձր է գնահատել Հայաստանում ԻԻՀ դեսպանության շուրջ քսան տարիների գործունեությունը և հույս հայտնել, որ դեսպան Սաջադին կշարունակի մեծ ուշադրությամբ վերաբերվել հայ-իրանական հարաբերություններին, ինչպես դա արել են Հայաստանում իրենց դիվանագիտական առաքելությունն ավարտած ու արդեն հայ ժողովրդի բարեկամների շարքերը համալրած Իրանի նախորդ բոլոր դեսպանները՝ ներդնելով բոլոր ջանքերը երկու երկրների միջև հարաբերությունների առավել ամրապնդման, համագործակցության հետագա ընդլայնման գործում:
Նշելով, որ դեսպան Սաջադին պաշտոնավարումն սկսել է կարևոր մի ժամանակահատվածում, երբ սպասվում է բարեկամ Իրանից բարձրաստիճան այցելություն՝ ԻԻՀ առաջին փոխնախագահ Էսհաղ Ջահանգիրիի այցը, Նախագահն ընդգծել է, որ նորանշանակ դեսպանի համար դա ակտիվ գործունեության շատ լավ սկիզբ և հնարավորություն է:
Հանդիպմանը ՀՀ նախագահը և ԻԻՀ դեսպանն անդրադարձել են երկկողմ բարձր մակարդակի պայմանավորվածությունների արդյունքում հաստատված տարբեր ոլորտներ ներառող հայ-իրանական խոշոր նախագծերի իրագործմանը, որոնք, նրանց համոզմամբ, որակական նոր մակարդակի կբարձրացնեն երկկողմ հարաբերությունները:
«Զրուցակիցները համակարծիք են եղել, որ ինտեգրացիոն նոր գործընթացներն ավելի լայն հնարավորություններ են ստեղծում Հայաստանի և Իրանի միջև երկկողմ ու բազմակողմ ձևաչափերով փոխգործակցությունը զարգացնելու համար» – նշվում է հաղորդագրության մեջ:
Դեսպանը մեծագույն դրվատանքով է խոսել իրանահայ համայնքի մասին՝ ընդգծելով համայնքի մեծ դերակատարությունը երկկողմ միջպետական հարաբերություների ամրապնդման գործում: Իր համար մեծ պատիվ համարելով բարեկամ Հայաստանում դեսպանի առաքելությունն իրականացնելը՝ Սեյեդ Քազեմ Սաջադին վստահեցրել է, որ նույնպիսի նվիրվածությամբ և եռանդով կշարունակի նախորդ դեսպանների աշխատանքը և այդ բարենպաստ հիմքի վրա կանի ամեն հնարավորը՝ զարգացնելու և ավելի խորացնելու հայ-իրանական կապերը:
ՀՀ նախագահին հավատարմագրերն է հանձնել Հայաստանում Իրանի նորանշանակ դեսպանը
20:34 09.10.2015 (Թարմացված է: 17:51 12.10.2015)
© Photo : ARKA news agency
Բաժանորդագրվել
Հանդիպմանը ՀՀ նախագահը և ԻԻՀ դեսպանն անդրադարձել են հայ-իրանական խոշոր նախագծերի իրագործմանը
