Հայ ալպինիստները նշում են մասնագիտական տոնն ու պատրաստվում են Պամիր բարձրանալ

ԵՐԵՎԱՆ, 9 հոկտեմբերի — Sputnik. Հոկտեմբերի 9–ին երրորդ տարին անընդմեջ նշվում է Հայկական լեռների և ալպինիստների օրը։

2013թ.–ին նման նախաձեռնությամբ է հանդես եկել Ալպինիզմի և լեռնային տուրիզմի հայկական ֆեդերացիան։

«Այդ օրը ֆեդերացիայի անդամները կամփոփեն 2015թ.–ի առաջին կիսամյակի արդյունքները, կհրապարակեն «Մարդը լեռներում» լուսանկարչական մրցույթի հաղթողների անունները, իսկ միջազգային վերելքի մասնակիցները կստանան դիպլոմներ», – նշվում է ֆեդերացիայի մամուլի ծառայության հաղորդագրության մեջ։

Օրվա ընտրությունը պատահական չէ։ 1829թ.–ի հոկտեմբերի 9–ին հայկական ժամանակակից գրականության հիմնադիր Խաչատուր Աբովյանն արշավախմբի հետ` Դորպատի համալսարանի պրոֆեսոր Իոհան Ֆրիդրիխ Պարոտի գլխավորությամբ, առաջին անգամ բարձրացավ Արարատ լեռը։

«Այս տարի ֆեդերացիան լուրջ արդյունքներ է գրանցել։ 2015թ.–ի հունվարից սկսած` ֆեդերացիայի անդամներն ու այս սպորտաձևի երկրպագուները մոտ 20 անգամ բարձրացրել են տարբեր գագաթներ, այդ թվում` Էլբրուս (5642 մ), Կազբեկ (5033 մ), Դեմավենդ (5610 մ)։ Վերելքներին մասնակցել է շուրջ 150 ալպինիստ», – նշված է հաղորդագրության մեջ։

2016թ.–ին Ալպինիզմի և լեռնային տուրիզմի հայկական ֆեդերացիայի անդամները պատրաստվում են բարձրանալ Պամիրի գագաթներից մեկը։ –0–