Նոբելյան մրցանակը շնորհվել է թունիսյան քաղաքական կազմակերպությանը

ԵՐԵՎԱՆ, 9 հոկտեմբերի– Sputnik. 2015թ.–ի Խաղաղության նոբելյան մրցանակը ստացել է «Թունիսում ազգային երկխոսության քառյակ» կազմակերպությունը։ Այդ մասին ուրբաթ Օսլոյում հայտարարել է Նորվեգիայի նոբելյան հանձնաժողովի նախագահ Կասի Կուլման Ֆիվեն։

Ինչպես նշվում է մամուլի հաղորդագրությունում, մրցանակը շնորհվում է «Թունիսում պլյուրալիստական ժողովրդավարության ստեղծման մեջ զգալի ավանդի համար 2011թ.–ի հեղափոխությունից հետո»։

«Քառյակը» ստեղծվել է 2013թ.–ին, երբ ժողովրդավարացման գործընթացները հայտնվել են ավերման սպառնալիքի տակ քաղաքական սպանությունների և սոցիալական ելույթների ալիքի արդյունքում։

Խաղաղության մրցանակի հավակնորդների անունները հանձնաժողովում չեն նշում. դա գաղտնիք է առաջիկա 50 տարիների համար։

Մրցանակակրին, ավանդույթի համաձայն, կներկայացնի Նորվեգիայի նոբելյան հանձնաժողովի նախագահը, որի պաշտոնում մարտ ամսից մինչև 2020թ.–ն ընտրվել է Կասի Կուլման Ֆիվեն։ Նա Նոբելյան հանձնաժողովի կազմում է 2003թ.–ից և Պահպանողականների կուսակցության ներկայացուցիչ է։

Նոբելյան հանձնաժողովում ընդհանուր առմամբ կա հինգ անդամ, որոնց երաշխավորում և վեց տարով ընտրում է Նորվեգիայի խորհրդարանը` հաշվի առնելով այնտեղ ներկայացված կուսակցությունները։ Նոբելյան հանձնաժողովի նախկին նախագահ Տուրբյորն Յագլանը շարունակում է հանձնաժողովում աշխատանքը` որպես շարքային անդամ։

Ներկայացված դափնեկիրների պարգևատրման արարողությունը տեղի կունենա դեկտեմբերի 10–ին Ստոկհոլմում` Նոբելյան մրցանակի հիմնադիր` շվեդ գործարար և գյուտարար Ալֆրեդ Նոբելի մահվան օրը։Նոբելի կտակած հինգ պարգևների ցանկում խաղաղության մրցանակը միակն է, որը հիմնադրի ցանկությամբ շնորհվում է Օսլոյում։ Մյուսները` ֆիզիոլոգիայի կամ բժշկության, ֆիզիկայի, քիմիայի և գրականության մրցանակները, շնորհվում են Ստոկհոլմում։

Այս 2015թ.–ին Նոբելյան մրցանակներից յուրաքանչյուրի գումարը կազմել է 8 մլն շվեդական կրոն (953 հազ. դոլար)։
 
2014 թվականի խաղաղության Նոբելյան մրցանակը շնորհվել է պակիստանցի իրավապաշտպան 17–ամյա Մալալա Յուսաֆզային (Malala Yousafzai) և 60–ամյա հնդիկ ակտիվիստ Կայլաշ Սատյարտիին (Kailash Satyarthi)։