ԵՐԵՎԱՆ, 9 հոկտեմբերի– Sputnik Ռուսաստանի միջամտությունը սիրիական հակամարտության գոտի առաջացրեց աննախադեպ իրավիճակ: Էականորեն փոխվեցին բոլոր իրողությունները, ինչպես նաև այն համակարգային իրավիճակը, որ առկա էր սիրական հակամարտության շրջանակում: «Sputnik-Արմենիա» ռադիոկայանի հետ զրույցում նման տեսակետ է հայտնել տարածաշրջանային հարցերով փորձագետ Արմեն Պետրոսյանը: Բանախոսն ընդգծում է, որ Ռուսաստանն այս քայլով ամրապնդեց միջազգային հեղինակությունը՝ որպես գերտերություն և գլխավոր խաղացող:
«Մի քանի ուղղություն կնշեմ, թե ինչ արեց սրանով Ռուսաստանը: Նախ վերահաստատեց իր դիրքերը՝ որպես համաշխարհային գերտերություն: Իրոք, ժամանակները փոխվել են: Սա նախկին Ռուսաստանը չէ: Չնայած այն բոլոր պատժամիջոցներին, խնդիրներին, որ այսօր ունի այդ երկիրը կապված ուկրաինական ճգնաժամի հետ, այնուհանդերձ, Ռուսաստանն այսօր հարց լուծող է: Հաջորդ կարևորագույն խնդիրը՝ Սիրիայում, որպես կարևորագույն մերձավորարեւելյան տարածք, իր դիրքերի պահպանումն է»,-ընդգծել է բանախոսը:
Բացի ազդեցության եւ հեղինակության ամրապնդումից, Ռուսաստանը Սիրիա մտնելով լուծեց նաեւ իր ներքին լսարանի խնդիրը: Փորձագետը հավելում է, որ վերջին տարիների սոցիալ-տնտեսական խնդիրները, որոշակի դժգոհություն էին առաջացրել ռուսաստանյան հասարակության շրջանում: «Եվ սրանով, կարծես, Ռուսաստանը լուծում է նաև ներքին լսարանի հարցը»,-նկատել է նա:
Ռուսական ռազմական ներկայությունը Սիրիայում ավելի շուտ նմանվում է քարոզչական պատերազմի: Արմեն Պետրոսյանի խոսքով՝ ռուսական քարոզչամեքենան իր ամբողջ կարողություններով լծվել է Սիրիայում սեփական իշխանությունների գործողություններն արդարացնելու կամ ամենաբարձր գնահատականներով ներկայացնելու գործին:
Ինչ վերաբերում է Թուրքիայի դիրքորոշմանը և թուրքական վերնախավի կոշտ հայտարարություններին՝ Սիրիայում Ռուսաստանի ավիացիայի ներկայության հարցում, ապա Արմեն Պետրոսյանը նկատում է, որ այդ հայտարարությունները նաև Թուրքիա-Արևմուտք և Թուրքիա-ՆԱՏՕ-ի գործընկերային հարաբերությունների համատեքստում են: «Բնականաբար, երրորդ համաշխարհային պատերազմ լինել չի կարող և, բնականաբար, ինչպես միշտ թուրքական իշխանությունները չափազանցնում են: Կարծես նման հայտարարություններով նրանք փորձում են իրենց արևմտյան գործընկերների ուշադրությունն ու զգոնությունը հրավիրել, որպեսզի ավելի ակտիվ և գործնական քայլեր իրականացնեն Ռուսաստանի դեմ»,-ասել է տարածաշրջանային հարցերով փորձագետը:
Արմեն Պետրոսյանը հավելել է նաև, որ թուրքական քաղաքականությունը Մերձավոր Արևելքում տապալվել է դեռ 2011 թվականին՝ «արաբական գարնան» հետևանքով:
Փորձագետ. Ռուսաստանը Սիրիա մտնելով ամրապնդեց միջազգային հեղինակությունը
13:57 09.10.2015 (Թարմացված է: 17:51 12.10.2015)
![Ситуация в Сирии Ситуация в Сирии - Sputnik Արմենիա](https://cdn.am.sputniknews.ru/img/76/92/769299_0:160:3073:1888_600x0_80_0_0_bcae368b13ff69cd4f070630da1fda0d.jpg)
© Sputnik / Дмитрий Виноградов
/ Բաժանորդագրվել
Չնայած այն բոլոր պատժամիջոցներին, խնդիրներին, որ այսօր ունի այդ երկիրը կապված ուկրաինական ճգնաժամի հետ, այնուհանդերձ, Ռուսաստանն այսօր հարց լուծող է