Ռոբերտո Դե Նիրոն «կերիտասարդանա» նոր ֆիլմի նկարահանումների համար

ԵՐԵՎԱՆ, 6 հոկտեմբերի– Sputnik. Մարտին Սկորսեզեի «Իռլանդացին» նոր ֆիլմի համար Ռոբերտ Դե Նիրոյին կերիտասարդացնեն տեխնոլոգիայի օգնությամբ, որն օգտագործվել է «Բենջամին Բաթոնի առեղծվածային պատմությունը» ֆիլմում։ Այդ մասին, ինչպես գրում է Lenta.ru–ն, հաղորդում է Digital Spy–ը։

«Մենք հիմա աշխատում ենք Մարտիի հետ (Սկորսեզեի) «Իռլանդացին» ֆիլմի վրա։ Այնտեղ կան էպիզոդներ` ժամանակով ավելի վաղ, որոնց համար մենք փորձարկումներ կանենք իմ արտաքինի հետ «Բենջամին Բաթոնի» օրինակով։ Ընդ որում, դա վերաբերում է նաև այլ դերասաններին, ոչ միայն ինձ»,– ասել է Դե Նիրո։

Դերասանի խոսքով` ֆիլմի նկարահանումները պետք է սկսվեն մինչև 2015թ.–ի վերջը։ «Իռլանդացին» նկարվելու է Չարլզ Բրենդտի «Լսել եմ` տներ եք ներկում» գրքի հիման վրա` նվիրված մաֆիայի վարձու մարդասպան Ֆրենկ Շիրանին, ով աշխատում է կոռումպացված արհմիութենական ղեկավար Ջիմի Հոֆի մոտ։

Բացի Դե Նիրոյից, ֆիլմում կնկարահանվեն Ալ Պաչինոն, Ջո Պեշին և Բոբի Կանավալեն։ Սա կլինի Դե Նիրոյի մասնակցությամբ Սկորսեզեի 9–րդ լիամետրաժ ֆիլմը, նրանք միասին ստեղծել են այնպիսի ֆիլմեր, ինչպիսիք են «Տաքսիստը», «Կատաղած ցուլը», «Խաղատուն» և «Լավ տղերքը»։

«Դևիդ Ֆինչերի «Բենջամին Բաթոնի առեղծվածային պատմությունը» ֆիլմը նկարահանվել է 2008թ.–ին։ Ֆրենսիս Սքոթ Ֆիցջերալդի պատմության էկրանավորման մեջ Բրեդ Փիթի հերոսը ծնվում է ծերունու դեմքով և, հասակ առնելով, աստիճանաբար երիտասարդանում է։ Սյուժեն կյանքի կոչելու համար Ֆինչերն օգտագործել էր հատուկ էֆեկտների տեխնոլոգիաներ և CGI։