ՆԱՏՕ. Թուրքիայի երկնքում ՌԴ ինքնաթիռներով իրականացված հարվածները պատահական չեն

ԵՐԵՎԱՆ, 6 հոկտեմբերի– Sputnik. Ռուսական ռազմական ինքնաթիռների կողմից Թուրքիայի օդային տարածքի խախտումները պատահական միջադեպեր չեն, կարծում է ՆԱՏՕ–ի գլխավոր քարտուղար Յենս Ստոլտենբերգը։ Նա նշել է, որ Ռուսաստանը դաշինքին չի ներկայացրել իրավիճակի իրական բացատրությունը։

«Մենք հանգստյան օրերի ընթացքում տեսել ենք երկու խախտում։ Թուրքական ինքնաթիռները թիրախ հանդիսացե՞լ են արդյոք ռուսական ինքնաթիռների համար, ես չեմ կարող մեկնաբանել մեր տվյալների հիման վրա։ Տեղեկությունը, որը մենք ստացել ենք, ինձ առիթ է տալիս ասելու, որ դա պատահական չէ»,– երեքշաբթի լրագրողներին է ասել Ստոլտենբերգը։

ՆԱՏՕ–ն պնդում է, որ ռուսական Սու-30 և Սու-24 ինքնաթիռները խախտել են Թուրքիայի օդային տարածքը հոկտեմբերի 3–ին և 4–ին` չնայած թուրքական իշխանությունների նախազգուշացմանը։

ՌԴ պաշտպանության նախարարությունը երկուշաբթի հայտարարել է, որ հոկտեմբերի 3–ին ռուսական Սու-30 ինքնաթիռը մի քանի վայրկյանով մտել է Թուրքիայի օդային տարածք։ ՊՆ–ում նշել են, որ տվյալ միջադեպը դարձել է անբարենպաստ եղանակային պայմանների արդյունք։

Հոկտեմբերի 4–ին տեղի ունեցած միջադեպերի վերաբերյալ ռուսական կողմը պաշտոնական հաստատում չի ներկայացրել։