Փորձագետ. Կիբեռանվտանգության առումով Հայաստանը կարկառուն հաջողություններ չունի, բայց չկան նաև լուրջ թերացումներ

ԵՐԵՎԱՆ, 6 հոկտեմբերի–Sputnik. Հայաստանի պաշտպանվածության մակարդակը՝ կիբեռանվտանգության առումով, համապատասխանում է նախկին Խորհրդային Միության երկրներում գործող անվտանգության մակարդակին, Sputnik Արմենիա ռադիոկայանի հետ զրույցում ասել է «Ինտերնետ հանրություն» ՀԿ-ի փոխնախագահ, համակարգչային պատահարների արձագանքման թիմի ղեկավար Գրիգոր Սաղիյանը։

Փորձագետի խոսքով` Հայաստանը չի կարող համեմատվել Ռուսաստանի պաշտպանվածության մակարդակի հետ, չունի կարկառուն հաջողություններ, բայց չկան նաև լուրջ թերացումներ:

Սաղիյանի ներկայացմամբ՝ կիբեռհարձակումները միայն կայքերի վրա հարձակումները չեն, այլ հարձակում համակարգչային ենթակառուցվածքի աշխատունակության վրա։

Փորձագետի կարծիքով` ինչ վերաբերում է կայքին վնաս տալուն, ապա այն ավելի շատ քարոզչական նշանակություն ունի, քանի որ նմանատիպ գրոհները արագորեն վերացվում են։

«Մեծ վտանգ է ներկայացնում հարձակումը՝ ուղղված ցանցի աշխատունակության դեմ, երբ տարբեր տեղերից միաժամանակ հարձակում են գործում կայքի վրա, սա ավելի մեծ վտանգ է ներկայացնում: Դրա դեմ միջոցներ գոյություն ունեն, որոնցից օգտվում են հայկական աղբյուրները», — նշել է նա:

Մասնագետի խոսքով՝ պետական, ծառայողական և այլ գաղտնիք պարունակող տեղեկատվության վերաբերյալ գոյություն ունի առանձին օրենք, իսկ այն կայքերը, որոնք պետական- գերատեսչական են, նրանց  պաշտպանության գործառույթը ստանձնում է ազգային անվտանգությունը։

«Կենտրոնական բանկը,  ըստ  սահմանադրության, անկախ մարմին է, նրա պաշտպանությունն իրականացվում է սեփական ուժերով: Ըստ ԿԲ-ի տեղեկությունների ՝ոչ մի ներթափանցում չի եղել, իսկ հարձակումների մասին տեղեկատվությունն անուղղակի է, մենք կարող ենք հիմնվել միայն պաշտոնական տվյալների վրա», – նշել է փորձագետը։

Մեկնաբանելով այն տեղեկությունը, որ Վրաստանի տարածքով անցնող ինտերնետ մատակարարող մալուխը ցանկանում է գնել ադրբեջանական ընկերությունը` «Ինտերնետ հանրություն» կազմակերպության փոխնախագահը նշել է, որ հնարավոր է գտնել միջոցներ, որոնք թույլ կտան փոքրացնել վտանգի աստիճանը:

«Շատ երկրներ, որոնք չունեն ծով, աշխատում են նման պայմաններում: Պետք է վարել հավասարակշիռ քաղաքականություն, հաշվի առնել այն, որ մենք ունենք նաև սահման Իրանի հետ, կարող ենք գործարկել այդ սահմանը, ունենալ տեխնիկական մեծ հնարավորություններ հարձակումներից խուսափելու համար», – ընդգծել է  Գրիգոր Սաղիյանը: