ԵՐԵՎԱՆ, 5 հոկտեմբերի – Sputnik. Մեզանից յուրաքանչյուրը կյանքում գոնե մեկ անգամ ջուրն է գցել հեռախոսը։ Ինչպես «փրկել» մեր գաջեթը հավանական «մահից» և այնպես անել, որ այն շարունակի գործել. այս հարցի շուրջ շատերն են մտահոգվում։ Ահա մի քանի խորհուրդ, որոնք կօգնեն «վերակենդանացնել» ձեր հեռախոսը, եթե այն արդեն հաջողացրել եք ջուրը գցել։
Առաջին հերթին այն անհրաժեշտ է անջատել, սակայն ոչ մի դեպքում թափ չտալ, քանի որ դրա հետևանքով ջուրը կարող է ավելի խորն անցնել։ Անհրաժեշտ է որքան հնարավոր է շուտ հանել մարտկոցը հեռախոսից կամ, ծայրահեղ դեպքում, անջատել սնուցումը։
Այնուհետև անհրաժեշտ է հեռախոսը քանդել և հանել դուրս եկող բոլոր հնարավոր մասերը` հետևի մասը, sim-քարտը, հիշողության քարտը, ականջակալների բնիկը։
Որքան հնարավոր է արագ պետք է չորացնել հեռախոսը, հեռացնել ողջ խոնավությունը։ Եթե դուք տանն եք, ապա ձեր բախտն ավելի շատ է բերել. դուք կարող եք օգտվել փոշեկուլի գլխադրից, որն ունի նեղ ծայրակալ, կամ ֆենից, սակայն դրանք անպայման պետք է սառը օդ արձակեն։
Եվ, իհարկե, անհրաժեշտ է հեռախոսը թողնել որպեսզի այն լավ չորանա։ Այդ ընթացքում կարելի է «տուժածին» մտցնել բրնձով լի ափսեի մեջ` բրինձը շատ լավ խոնավություն է քաշում։ Եվ ամենակարևորը` համբերությամբ զինվեք և այն հանգիստ թողեք 48 ժամ ամենաքիչը։ Եթե դրանից հետո դուք խոնավության որևէ հետք նկատեք նրա վրա (օրինակ քրտնած էկրան), սպասեք ևս մի երկու օր։ Եթե արտաքինից ամեն ինչ նորմալ լինի, կարելի է միացնել։
Ուշադի՛ր եղեք և օգտագործեք հեռախոսը զգուշությամբ։
