Գերմանիայում փախստականների թիվը տարեվերջին կարող է հասնել 1,5 միլիոնի

ԵՐԵՎԱՆ, 5 հոկտեմբերի– Sputnik. Գերմանիայի իշխանություններն ակնկալում են, որ մինչև տարեվերջ երկիր կժամանի մինչև 1,5 միլիոն միգրանտ, ինչը 1,5 անգամ ավել է նախկինում տված կանխատեսումներից, հաղորդում է գերմանական Bild թերթը` հղում անելով կառավարական զեկույցին, որը կհրապարակվի հոկտեմբերի 5–ին։

«Միգրացիոն ճնշումը կշարունակի աճել։ Մենք չորրորդ եռամսյակում սպասում ենք օրական 7-10 հազար անօրինական սահմանախախտների»,– նշվում է զեկույցում, հաղորդում է Lenta.ru–ն` հղում անելով գերմանական Bild տաբլոիդին։ Ինչպես նշվում է փաստաթղթում, փախստականների մեծ թիվը կարող է լուրջ բեռ լինել երկրամասերի և իշխանության տեղական մարմինների համար։

Բեռլինում նաև մտավախություն ունեն, որ նրանք, ովքեր ապաստան են ստացել, Գերմանիա կտեղափոխեն իրենց հարազատներին։ Հաշվի առնելով, որ Մերձավոր Արևելքում ընդունված է ունենալ մեծ ընտանիքներ, դա նշանակում է, որ տվյալ տարածաշրջանից յուրաքանչյուր փախստականին բաժին է ընկնում 4-8 ազգակցական, որոնք վաղ թե ուշ կհայտնվեն ԳԴՀ–ում, նշվում է զեկույցում։

Եվրոպայում զարգանում է ճգնաժամ` կապված փախստականների անկառավարելի հոսքի կտրուկ աճի հետ։ Հոկտեմբերի 4–ի դրությամբ Արտաքին սահմանների անվտանգության գործակալության (Frontex) տվյալներով` տարեսկզբից ԵՄ սահմանը հատել են ավելի քան 500 հազար միգրանտներ։ՄԱԿ–ն առաջիկա երկու տարիներին կանխատեսում է, որ վերաբնակիչների թիվն առնվազն 850 հազար կկազմի։

ԵՄ–ի արդարադատության և ներքին հարցերով խորհուրդը սեպտեմբերի 22–ին հաստատել է Իտալիայից և Հունաստանից 120 հազար փախստականներին Եվրամիության տարածքում բաշխելու պլանը։ Համապատասխան որոշում է ընդունել Եվրամիության անդամ երկրների մեծամասնությունը։ Դեմ են հանդես եկել Չեխիան, Հունգարիան, Ռումինիան և Սլովակիան։ Ֆինլանդիան ձեռնպահ է մնացել։

Հարկադիր վերաբնակիչները պետք է տարածվեն ԵՄ երկրներում` բնակչության, տնտեսության, կենսամակարդակի նկատմամբ հարաբերակցությամբ։ Միգրանտներին ընդունել չցանկացող երկրները կտուգանվեն իրենց ՀՆԱ–ի 2 հազարերորդական տոկոսով։ Սլովակիայի համար այդ գումարը կկազմի մոտավորապես 2 մլն դոլար։