Օկտոբերֆեստի այցելուների թիվն այս տարի նվազել է

ԵՐԵՎԱՆ, 5 հոկտեմբերի– Sputnik. Մյունխենում բավարական գարեջրի ամենամյա 182–րդ տոնը` Օկտոբերֆեստը, որն ավարտվել է նախօրեին, այս տարի 5,9 մլն հյուր է ունեցել, ինչը 400 հազարով քիչ է անցած տարվա ցուցանիշից։

Միևնույն ժամանակ, ինչպես նշում է muenchen.de պաշտոնական քաղաքային պորտալը, այս անգամ սեպտեմբերի 19–ից հոկտեմբերի 4–ը «Թերեզայի մարգագետնում» տեղի ունեցած տոնակատարությանը մասնակցել են բազմաթիվ ընտանիքներ Մյունխենից։

Ինչպես կարծում է Օկտոբերֆեստի ղեկավար Յոզեֆ Շմիդը, հյուրերի թվի նվազման պատճառները մի քանիսն են, օրինակ` լրացուցիչ սահմանային հսկողությունը, որը ներմուծվել է փախստականների ճգնաժամի պատճառով։ Միգրանտների հետ կապված իրավիճակն ընդհանուր առմամբ կարող էր բացասական ազդել տոնի վերաբերյալ մարդկանց տրամադրության վրա։ Չնայած դրան, ինչպես նշում է Շմիդը, հանրությունը նախկինի պես «շատ բարձր մակարդակում» է եղել։

Պորտալի տվյալներով` տոնի անցկացման ժամանակ հյուրերը խմել են 7,3 մլն լիտր գարեջուր, ինչը 400 հազար լիտրով ավելի քիչ է, քան 2014թ.–ին։ Նվազել է նաև վնասվածքների թիվը (372 դեպք 398–ի փոխարեն)։ Ոստիկանություն է ստացվել 2017 դիմում, ինչը զգալիորեն քիչ է, քան 2014–ին, երբ ոստիկանություն են կանչել 2205 անգամ։

Գարեջրի սիրահարների և փախստականների միջև բախումներից խուսափելու համար Բավարիայի արդարադատության նախարարությունում այս տարի ստեղծել են հատուկ ճգնաժամային շտաբ։ Ներկա պահին Բավարիայում է գտնվում շուրջ 30 հազար փախստական։

Թեև իշխանությունը մտավախություն ուներ, որ փախստականների ու հյուրերի միջև կարող են ընդհարումներ լինել, այնուհանդերձ ոստիկանությունը հաղորդել է, որ նմանատիպ խնդիրներ չեն ծագել։ Իրավիճակը շարունակել է հանգիստ մնալ ինչպես Օկտոբերֆեստի տարածքում, այնպես էլ `Մյունխենի գլխավոր կայարանի շրջանում, որն ավանդաբար տոնի հյուրերի գլխավոր տրանսպորտային հանգույցն է։ Վերջին շրջանում կայարանն աշխատում է արտակարգ ռեժիմով, քանի որ այստեղ են ժամանում մերձարևելյան փախստականներով գնացքներ Հունգարիայից և Ավստրիայից։

Օկտոբերֆեստը սկիզբ է առել 1810թ.–ի հոկտեմբերի 12–ից, երբ թագաժառանգ Լյուդվիգը տոնել է ամուսնությունն արքայադուստր Թերեզա ֆոն Զաքսեն–Հիլդբուրգհաուզենի հետ։։ Հանդիսությունները, որոնց հրավիրել են Մյունխենի քաղաքացիներին, տեղի են ունեցել քաղաքային դարպասների առաջ` մարգագետնում, որն անվանել են ի պատիվ հարսնացուի։ Իսկ բավարական թագաժառանգը հետագայում բավարական գահ է բարձրացել։