ԵՐԵՎԱՆ, 4 հոկտեմբերի — Sputnik. ՀԱՊԿ գլխավոր քարտուղար Նիկոլայ Բորդյուժան նշում է, որ ղարաբաղյան հակամարտության գոտում հետագա լարվածությունն անընդունելի է:
Սեպտեմբերի 25-ին Ղարաբաղի ուժերի դիրքերի նկատմամբ իրականացված հրետանահրթիռային հարվածի հետևանքով զոհվել են ԼՂՀ ՊԲ չորս զինծառայողներ։ Սեպտեմբերի 24-ին Հայաստանի հյուսիսում գտնվող բնակավայրերի ուղղությամբ Ադրբեջանի իրականացրած գնդակոծությունների հետևանքով զոհվել է երեք խաղաղ բնակիչ։ Գնդակոծությունների ժամանակ Ադրբեջանի ԶՈւ–ն օգտագործում է հրետանի, համազարկային կրակի ռեակտիվ համակարգեր, ականանետներ և նռնականետներ։ ԼՂՀ ՊՆ–ի հաղորդագրության համաձայն` ղարաբաղյան կողմի հատուցման ակցիայի հետևանքով Ադրբեջանի կողմից զոհվել է ավելի քան տասը մարդ, կան նաև վիրավորներ։
«Մեզ համար միանգամայն անընդունելի է, երբ ծանր զինատեսակներից գնդակոծվում են խաղաղ բնակավայրերը», — Երևանում լրագրողներին ասաց ՀԱՊԿ գլխավոր քարտուղար Նիկոլայ Բորդյուժան:
Բորդյուժան այդ կապակցությամբ ընդգծեց, որ միջազգային հանրությունը պետք է անի ամեն ինչ հետագա սրացում թույլ չտալու համար: Նա նշեց, որ հաշվի առնելով իրավիճակը Սիրիայում, Իրաքում և այլ երկրներում՝ ևս մեկ «թեժ կետ» ոչ ոքի պետք չէ:
Պատասխանելով այն հարցին, թե ինչու ՀԱՊԿ-ն չի միջամտում իրավիճակին` Բորդյուժան ասաց, որ կազմակերպությունը կարող է միջամտել միայն այն դեպքում, եթե ՀԱՊԿ անդամ երկրների մեկն ի վիճակի չէ ինքնուրույն ապահովել իր անվտանգությունը, բայց դրա համար անհրաժեշտ է հենց այդ երկրի դիմումը:
«Ամեն ինչ կախված է Հավաքական անվտանգության խորհրդի որոշումից, բայց հիմքում այն կարևոր հանգամանքն է, որ պետությունն ինքը պետք է դիմի այդ խնդրանքով»,- ասաց ՀԱՊԿ գլխավոր քարտուղարը:
«Իմ կարծիքով, Հայաստանի բանակն ունի իր երկրի անվտանգությունը, կայունությունն ու տարածքային ամբողջականությունն ապահովելու բոլոր հնարավորությունները»,- ավելացրել է նա:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ.–ի դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Հանրաքվեին հաջորդեցին Ադրբեջանի ձեռնարկած ռազմական լայնածավալ գործողությունները, որոնց հետևանքով Ադրբեջանը կորցրեց վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ.–ի մայիսի 12-ին զինադադարի վերաբերյալ եռակողմ համաձայնագիր կնքելուց հետո հակամարտության գոտում դադարեցին ռազմական գործողությունները, որոնց հետևանքով երկու կողմն, ընդհանուր առմամբ, շուրջ 25-30 հազար զոհ ունեցավ, իսկ մոտ մեկ միլիոն մարդ էլ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան:
