ԵՐԵՎԱՆ, 3 հոկտեմբերի — Sputnik. Huffington Post հեղինակավոր ինտերնետ–պարբերականի բլոգեր և լուսանկարիչ Կալպանա Սանդերը (Հնդկաստան) հոդված է գրել Հայաստանի մասին և թվարկել է այդ լեռնային երկրում ապրող և քրիստոնեությունը որպես պետական կրոն ընդունած ժողովրդին սիրահարվելու տասը պատճառները։
Երևանը հավերժ երիտասարդ է
Առաջին անգամ Հայաստան ժամանող մարդիկ լսել են այդ երկրի մասին, որպես հնագույն վանքերի երկիր, գիտեն նրա դերը պատմության մեջ։ Նրանց համար հաճելի անակնկալ է դառնում ժամանակակից Երևանի կենտրոնը, որտեղ ամեն ինչ` դեռահասից մինչև տարեց, հագնված են ամենաաներևակայելի ու նորաձև ոճով, այնտեղ կան բազմաթիվ շքեղ ռեստորաններ և սրճարաններ, որոնք լեփ–լեցուն են նույնիսկ աշխատանքային ժամերին։ Ավելի քան 1700 տարվա պատմություն ունեցող քաղաքի համար Երևանը բավականին երիտասարդ է երևում։
Հայաստանը հիասքանչ վանքերի երկիր է
Հայկական վանքերը ցնցում են իրենց գեղեցկությամբ։ Դրանցից յուրաքանչյուրը գեղեցիկ է յուրովի։ Մութ և պաղած, դեկորացիաներից զուրկ` դրանք պահպանել են բազմադարյա աղոթքների հոգևոր մթնոլորտը։ Որպես կանոն, դրանք գտնվում են գեղատեսիլ վայրերում` Սևանա լճի ափին, ժայռերի և զառիթափ բլուրների վրա։ Հայաստանյան վանքերը բացառիկ ակուստիկա ունեն։
Արարատը՝ Հայաստանի ազգային խորհրդանիշ
Արարատ… Անչափ գեղեցիկ լեռ, որի վրա Մեծ ջրհեղեղից հետո կանգ է առել բիբլիական Նոյյան տապանը։ Արարատը խորհրդանշում է ազգային ինքնագիտակցությունը, բայց ողբերգականն այն է, որ Հայաստանի գլխավոր խորհրդանիշը, ըստ էության, գտնվում է ժամանակակից Թուրքիայի տարածքում` Հայաստանի սահմանից 32 կիլոմետր հեռավորության վրա։ Այդքան մոտ և այդքան հեռու…
Սրճարանները Երևանին եվրոպական տեսք են հաղորդում
Այն, ինչ առաջինն է աչքի ընկնում Երևանում, սրճարանների առատությունն է, ինչը քաղաքին եվրոպական տեսք է հաղորդում։ Քաղաքը բառացիորեն հեղեղված է սրճարաններով։ Յուրաքանչյուր այգում, յուրաքանչյուր հրապարակում, մի շարք փողոցներում կան սրճարաններ, որոնք լի են մարդկանցով՝ անկախ օրվա ժամից։ Եվ այդ սրճարանում մի գավաթ սուրճի շուրջ զրույցները չեն վնասի ձեր բյուջեն, քանի որ Հայաստանում գներն այդքան էլ բարձր չեն։
Ժամանակակից արվեստի առատություն
Երևանը տառացիորեն հեղեղված է ժամանակակից արվեստով… Ժամանակակից արվեստի գլխավոր կենտրոնը «Կասկադ» համալիրն է, որտեղ գտնվում է Գաֆէսճեան արվեստի կենտրոնը՝ ժամանակակից գործիչների հետաքրքիր աշխատանքներով։ Ընդ որում` դրանցից շատերը տեղադրված են դեպի կենտրոն տանող ճանապարհին, ինչպես նաև աստիճանների վրա։ Քաղաքում տեղադրված են նաև բազմաթիվ ինստալացիաներ ու հուշարձաններ։
Խաչքարեր
Հայկական խաչքարերը գերում են տերևի, խաղողի, նռան և սուրբ պատկերների նուրբ զարդանախշերով։ Խաչը քրիստոնեության ամենակարևոր խորհրդանիշն է, բայց Հայաստանում այն առանձնահատուկ նշանակություն ունի։ Այսօր խաչքարերն ընդգրկված են ՅՈՒՆԵՍԿՕ–ի ոչ նյութական մշակութային ժառանգության ցանկում։
Մրգերի բազմազանություն և օրգանական սնունդ
Հայաստանում ամեն քայլափոխի կարելի է տեսնել ալոճ կամ քաղցր սուջուխ վաճառող կանանց։ Դրանք դրված են «թթու» լավաշի, ծիրանի, նուշի ու թզի կողքին։ Զբոսաշրջիկները շատ են սիրում դեղձի, ծիրանի և ելակի կոմպոտները։ Հայաստանը հիրավի մրգի, բանջարեղենի, խոտաբույսերի և անուշեղենի երկիր է։ Թղթի պես նուրբ հացի` լավաշի մեջ փաթաթում են խորովածը, ինչպես նաև հատուկ ձևով պատրաստած կարտոֆիլը։ Զբոսաշրջիկները նաև շատ են սիրում հայկական մածունը։
Լանդշաֆտների աներևակայելի բազմազանություն
Հայաստանը լեռնային երկիր է, և ճանապարհորդելու ընթացքում դուք կարող եք ինքներդ համոզվել, թե ինչպես է փոխվում լանդշաֆտը` հյուսիսային կանաչ բլուրներից մինչև ավելի անապատացած հարավ։ Ամայի ճանապարհներ, լեռներով շրջապատված Սևանա լիճ, ցորենի դաշտերով և խաղողի այգիներով շրջապատված Խոր Վիրապ։ Հայաստանում է նաև Փոքրիկ Շվեյցարիան` Դիլիջանի ազգային պարկը։
Եվ երաժշտություն, երաժշտություն…
Գրեթե ամենուր երաժշտություն է հնչում` ավանդական դուդուկից մինչև փողոցային երաժիշտներ և Հանրապետության հրապարակի «երգող շատրվաններ»։ Հայաստանը հարուստ երաժշտական ավանդույթներ ունի, որոնք սկիզբ են առնում աշխարհահռչակ Կոմիտասից։
Հայաստանում ապրում են աշխարհի ամենաբարյացակամ մարդիկ
Հայաստանում մարդիկ շատ բարյացակամ են։ Հոդվածագրին զարմացրել է այն, որ մարդիկ մոտենում են ու հետաքրքրվում` Հնդկաստանի՞ց եք, հետո պատմում, թե ինչն է նրանց դուր գալիս այդ երկրում։ Ե՛վ մեծահասակները, և՛ երեխաները միշտ պատրաստ են լուսանկարվելու, իսկ վաճառողները` անվճար հյուրասիրելու։ Գրեթե միշտ հետաքրքրվում են` Հայաստանը ձեզ դու՞ր եկավ։
