«Նոր ալիք» մրցույթում Հայաստանը ներկայացնում է Գրիգոր Կյոկչյանը

ԵՐԵՎԱՆ, 3 հոկտեմբերի – Sputnik. Սոչիում անցկացվող «Նոր ալիք» երիտասարդ կատարողների միջազգային երաժշտական մրցույթում Հայաստանը ներկայացնում է երգիչ և պրոդյուսեր Գրիգոր Կյոկչյանը։

Նա ներկայացնելու իր հեղինակած «Աֆրո» երգը` դեղին զգեստով և աֆրիկյան հյուսերով աղջկա մասին։

Կյոկչյանը Երևանի Երգի պետական թատրոնի մենակատար է, «Հայաստանի ձայնը» նախագծի մասնակից։ Նա Ղրիմում անցկացված «Մանկական Նոր ալիք 2015»–ում երրորդ տեղը զբաղեցրած 12–ամյա Մերի Քոչարյանի պրոդյուսերն է։

«Նոր ալիք» մրցույթը, որը բոլոր նախորդ տարիներին անցկացվում էր Յուրմալայում, այս տարի անցկացվում է Սոչիում և կտևի մինչև հոկտեմբերի 11–ը։

Ինչպես նշված է մրցույթի պաշտոնական կայքում, «Նոր ալիքի» հատուկ հյուրերի թվում հոկտեմբերի 5–ին ելույթ կունենա աշխարհահռչակ դուդուկահար, վարպետ Ջիվան Գասպարյանը։

Մրցույթին մասնակցում են 15 կատարողներ 12 երկրից` Ռուսաստանից, Հայաստանից, Բելառուսից, Բուլղարիայից, Հունաստանից, Ինդոնեզիայից, Իտալիայից, Ղազախստանից, Լատվիայից, Ուկրաինայից, Խորվաթիայից, Շվեյցարիայից։
 
Մրցույթի պատվավոր հյուրերի թվում են Ալլա Պուգաչովան, Ֆիլիպ Կիրկորովը, Անի Լորակը, Սերգեյ Լազարևը, Վալերիան, Իոսիֆ Կոբզոնը, Պոլինա Գագարինան, Ալեքսանդր Բույնովը, Լարիսա Դոլինան, Իգոր Կրուտոյը, Լեոնիդ Ագուտինը, Կոնստանտին Մելաձեն, Էրոս Ռամազոտին, Քրիստինա Օրբակայտեն, Նիկիտա Միխալկովը, Լայմա Վայկուլեն և ուրիշներ։