ՌԴ ՌՏՈՒ–ն Սիրիայում ոչնչացրել է ահաբեկչական խմբավորման հրամանատարական կետը

ԵՐԵՎԱՆ, 3 հոկտեմբերի – Sputnik. Ռուսական ավիացիան «Հմեյմիմ» ավիակայանից շարունակում է բարձր արդյունավետության թիրախային հարվածներ հասցնել «Իսլամական պետություն» ահաբեկչական խմբավորման օբյեկտներին, շաբաթ օրը հայտնել է ՌԴ պաշտպանության նախարարության պաշտոնական ներկայացուցիչ Իգոր Կոնաշենկովը։

«Անցած օրվա ընթացքում Սիրիայում ռուսական ավիախմբի Սու-34 և Սու-24Մ ինքնաթիռներն ավելի քան 20 թռիչք–գրոհ են կատարել ԻՊ ահաբեկչական խմբավորման օբյեկտների ուղղությամբ»,– ասել է Կոնաշենկովը ՌԴ պաշտպանության նախարարության ճեպազրույցում։

Նա հայտնել է, որ երեկոյան և գիշերային ժամերին ավիակայանից իրականացված վեց թռիչքների արդյունքում թիրախային հարվածներ են հասցվել ահաբեկչական ենթակառուցվածքի երեք օբյեկտների ուղղությամբ։

«Սու–34 ինքնաթիռից ԲԵՏԱԲ-500 բետոնահար ավիառումբի թիրախային հարվածով Ռակա բնակավայրի շրջանում ոչնչացվել է ահաբեկչական խմբավորման հրամանատարական կետերից մեկը, ինչպես նաև պայթուցիկ նյութերի և զինամթերքի ստորգետնյա պահեստը»,– ասել է գեներալը։

Մեկնաբանելով Ռակա շրջանում ռուսական ինքնաթիռների կիրառման տեսանկարահանումը` Կոնաշենկովը նշել է, որ «բունկերի ուժեղ պայթյունը վկայում է, որ այնտեղ մեծ թվով զինամթերք էր պահվում»։

«Էկրանին տեսնում եք, թե ինչպես է ավիացիոն զինամթերքի հարվածն օբյեկտին լեռնային տեղանքում ոչնչացնում այն` պայթյուն և հրդեհի բազմաթիվ օջախներ առաջացնելով։ Օբյեկտն ամբողջությամբ ոչնչացվել է»,– ասել է նա։

Նա նաև մեկնաբանել է Ջիսր–Էշ–Շուղուր շրջանում ավիացիայի գործողության տեսանկարահանումը։

«Կադրերում ծխի հսկայական ամպը և ռմբափոսը վկայում են, որ ավիառումբերը ճշգրիտ հարված են հասցրել, ինչի հետևանքով օբյեկտը ոչնչացվել է»,– ասել է Կոնաշենկովը։