Երևանի կենտրոնում երթևեկությունը կաթվածահար էր եղել

ԵՐԵՎԱՆ, 3 հոկտեմբերի –Sputnik. Այսօր՝ հոկտեմբերի 3-ին, առավոտից կաթվածահար է եղել Երևանի կենտրոնական փողոցների երթևեկությունը։ Երթուղային տաքսիները  փոխել էին իրենց սովորական ուղին, մարդիկ զարմացած միմյանց էին հարցնում, թե որն է փողոցները փակելու պատճառը։

Իսկ կենտրոնական փողոցներից մի քանիսը փակ էին, որովհետև այսօր Երևանում անցկացվում է վազքի առաջին միջազգային կիսամարաթոնը, որը կրում է «Երևան ՌԱՆԱՐՄ 2015» անվանումը։

Հարկ է նշել, որ կիսամարաթոնի անցկացման վերաբերյալ հանրային իրազեկում չի եղել, ինչն էլ քաղաքացիների դժգոհության պատճառ էր դարձել։

Երևանի միջազգային կիսամարաթոնը և մյուս վազքարշավները կազմակերպվում են պետական ծրագրի շրջանակներում՝ Սպորտի և երիտասարդության հարցերի նախարարության, Երևանի քաղաքապետարանի, Հայաստանի ազգային օլիմպիական կոմիտեի և Հայաստանի աթլետիկայի ֆեդերացիայի հովհանու ներքո:

Միջոցառումը մեկնարկել է Հանրապետության հրապարակից և ներառել է 4 վազքարշավ` կիսամարաթոն (21,097 կմ), փոխանցումավազք (2 x 10,550 կմ), 5 կմ վազք, 2,5 կմ վազք` 12–ից 15 տարեկան դպրոցականների համար: