ԵՐԵՎԱՆ, 2 հոկտեմբերի – Sputnik. The Aurora Prize for Awakening Humanity միջազգային մրցանակի առաջին հաղթողի անունը, ով կպարգևատրվի 100 հազար ԱՄՆ դոլար մրցանակով, կհրապարակվի 2016 թվականի ապրիլին, հայտնում է 100 LIVES նախագծի պաշտոնական կայքը։
100 LIVES բարեգործական նախագիծը` The Aurora Prize միջազգային նոր մարդասիրական մրցանակով, հիմադրվել է Հայոց ցեղասպանության 100-րդ տարելիցի կապակցությամբ` հայտնի հասարակական գործիչների, գիտնականների և ձեռներեցների կողմից, որոնց թվում են համահիմնադիրներ Ջորջ Քլունին, Էլի Վիզելը, Ռուբեն Վարդանյանը, Նուբար Աֆեյանը և Վարդան Գրեգորյանը
Մրցանակը կոչվել է Ավրորա Մարտիկանյանի անունով, ով վերապրել է ցեղասպանությունն ու փրկվել ռուսական բանակի օգնությամբ։ Հետագայում 1919 թվականին ԱՄՆ–ում էկրան է բարձրացել Հայոց ցեղասպանությանը նվիրված «Հոշոտված Հայաստան» ֆիլմը, որտեղ խաղացել է Մարտիկանյանը։
Ինչպես հայտնում է 100 LIVES կայքը, ավարտվեց «Ավրորա» մրցանակի (Aurora Prize for Awakening Humanity) անդրանիկ մրցանակաբաշխության թեկնածուների առաջադրման փուլը։ Մրցանակը հիմնելու հիմք են եղել հարյուր տարվա վաղեմություն ունեցող Օսմանյան կայսրությունում Հայոց ցեղասպանության ժամանակ խիզախության հազարավոր չպատմված պատմությունները և ողջ մնալու ձգտումները։ Նախագծի շրջանակում ցեղասպանությունը վերապրածների, ինչպես նաև փրկության գործին մասնակցած մարդկանց սերունդները կներկայացնեն իրենց պատմությունները։
100 LIVES նախագծի ընտրող հանձնաժողովի համանախագահ, հոլիվուդյան դերասան Ջորջ Քլունին Երևանում հաջորդ գարնանը հատուկ արարողություն կանցկացնի, որտեղ կհայտարարվի մրցանակի արժանացած մարդու անունը։
1 մլն դոլարի չափով ամենամյա դրամաշնորհը կհանձնվի այն թեկնածուին, ով իր հերթին կտրամադրի միջոցներ կազմակերպությանը, որը ոգեշնչել է նրան նման քայլեր կատարելու համար։
«Մարդասիրությունը, առատաձեռնությունը, ուժը, որոնք դրսևորվել են այն մարդկանց կողմից, ովքեր փրկել են նման մեծ թվով հայերի, պարտավորեցնում են մեզ պատմել այդ պատմությունները աշխարհին», – ասել է Ռուբեն Վարդանյանը։
Ընտրող հանձնաժողովի ինը անդամները կհավաքվեն այս տարեվերջին, որպեսզի ընտրեն համապատասխան թեկնածուների վերջնական ցուցակը։ Դրանից հետո հանձնաժողովը մանրակրկիտ կուսումնասիրի յուրաքանչյուր թեկնածուին իր անձնական որակների, գործին նվիրված լինելու հիման վրա` հաշվի առնելով թեկնածուների գործունեության մասին վկայող ցանկացած ապացույց։
Հանձնաժողովի համանախագահ Էլի Վիզելը նշել է առաջիկա քննարկումների կարևորությունը։
«Ես անհամբեր սպասում եմ թեկնածուների ընտրությանը։ Չափազանց կարևոր է, որ մենք հենց այսօր մարդասիրական արարքների դրական գնահատական տանք, երբ աշխարհը առերեսվում է մարդասիրական ճգնաժամի հետ, ռեսուրսների պակաս է զգում դրանք լուծում տալու համար», – նշել է Վիզելը։
100 LIVES նախագիծը հիմնադրվել է ներկայացնելու համար Հայոց ցեղասպանության հետևանքները, ինչպես նաև այն, թե մշակույթի, արվեստի, սպորտի, գիտության և բիզնեսի ոլորտում որքան լուրջ ներդրում է հաջողվել կատարել ցեղասպանությունից փրկված մարդկանց և նրանց ընտանիքներին։
1915–1923 թվականներին իրականացված Հայոց ցեղասպանության ժամանակ զոհվել է մոտ 1,5 մլն հայ։ Մոտ 500 հազարը փրկվել է, մեծամասնությունը` առանձին մարդկանց և կազմակերպությունների միջամտության շնորհիվ։
«Ավրորա» մրցանակը համախմբում է աշխարհում մարդու իրավունքների պաշտպանության ոլորտի առաջատար գործիչների, որոնց թվում են օսկարակիր Ջորջ Քլունին, Խաղաղության նոբելյան մրցանակակիրներ Էլի Վիզելն ու Օսկար Արիասը, ՄԱԿ–ի մարդու իրավունքների հարցերով նախկին գերագույն հանձնակատար Մերի Ռոբինսոնը, ՄԱԿ–ի գլխավոր քարտուղարի ցեղասպանության հարցերով խորհրդական Գարեթ Էվանսը, ՄԱԿ–ի գլխավոր քարտուղարի մարդու իրավունքների պաշտպանության հարցերով նախկին հատուկ ներկայացուցիչ, ՄԱԿ–ի գլխավոր քարտուղարի իրավապաշտպանների գործերով նախկին հատուկ ներկայացուցիչ, աշխարհահռչակ իրավապաշտպան Հինա Ջիլանին և Նյու Յորքի Քարնեգի կորպորացիայի նախագահ Վարդան Գրեգորյանը, ովքեր կդառնան կարգադիր կոմիտեի անդամներ։
«Ավրորա» մրցանակի առաջին հաղթողը կպարգևատրվի 100 հազար ԱՄՆ դոլարով
21:20 02.10.2015 (Թարմացված է: 17:48 12.10.2015)
Բաժանորդագրվել
100 LIVES նախագծի ընտրող հանձնաժողովի համանախագահ, հոլիվուդյան դերասան Ջորջ Քլունին Երևանում հաջորդ գարնանը հատուկ արարողություն կանցկացնի, որտեղ կհայտարարվի մրցանակի արժանացած մարդու անունը
