Քաղաքապետարան. «Էրեբունի–Երևան» տոնակատարության համար նախատեսված գումարները սահմանամերձ գյուղեր չեն ուղղվի

ԵՐԵՎԱՆ, 30 սեպտեմբերի – Sputnik. «Էրեբունի-Երևան 2797» տոնակատարության համար նախատեսված գումարները սահմանամերձ գյուղեր չեն ուղղվի, որովհետև քաղաքապետարանն իր բյուջեն կարող է օգտագործել բացառապես Երևան քաղաքի վարչական սահմաններում ու մայրաքաղաքի կարիքների համար, ասաց Երևանի քաղաքապետի տեղակալ Արամ Սուքիասյանը։

«Էրեբունի–Երևան» տոնակատարությունն այս տարի անցկացվում է հոկտեմբերի 10-11–ին։ Քաղաքապետարանն այդ օրերին մի շարք միջոցառումներ կանցկացնի, մինչդեռ Ֆեյսբուք սոցիալական կայքի օգտատերերը կոչ են անում Երևանի քաղաքապետարանին չեղյալ հայտարարել տոնակատարությունը և դրա համար նախատեսված գումարն ուղղել սահմանամերձ գյուղեր։

Ըստ նրա, ինչպես նախորդ տարի, այս տարի էլ ավագանու հաստատմամբ համայնքային բյուջեից 130 մլն դրամ է հատկացվել տոնակատարության ծրագրերին։

«Ինչ վերաբերում է քննարկվող հարցին, Երևան համայնքը իր լիազորություններն ունի՝ սահմանված օրենքով և դրանք տարածվում են միայն Երևան համայնքի վարչական տարածքում։ Ասել է թե՝ քաղաքապետարանն իր բյուջեն կարող է օգտագործել բացառապես Երևան քաղաքի վարչական սահմաններում ու մայրաքաղաքի կարիքների համար։ Այն կարծիքը, որ պետք է չեղարկել տոնը, անշուշտ, քննարկվել է։ Բայց Երևանը, ինչպես աշխարհի բոլոր մյուս քաղաքներն ու հատկապես՝ մայրաքաղաքները, պետք է նշի իր տոնը և պետք է հպարտությամբ ու ներկայանալի նշի, որովհետև համայն հայության մայրաքաղաքն է»,– ասել է Սուքիասյանը։

Նա նշել է, որ չեղարկելով մենք այն պետության ջրաղացին ջուր լցրած կլինենք, ով հենց սպասում է մեր ընկճվելուն։

«Եվ հետո, արդյո՞ք նման քայլը չի նշանակի կասկածել մեր զինվորի ոգուն, սպայական անձնակազմի պատրաստականությանն ու ռազմական մտքին… Անշուշտ, սահմանում խաղաղությունը բոլորիս է անհրաժեշտ, և մենք ունենք մարտունակ բանակ, որը պատվով ապահովում է մեր սահմանների ամրությունը»,- նշել է Երևանի քաղաքապետի տեղակալ Արամ Սուքիասյանը։