Քաղաքագետ. ՀՀ նախագահի ելույթի շեշտադրումները տարբեր լսարանների էին ուղղված

ԵՐԵՎԱՆ, 30 սեպտեմբերի –Sputnik. ՀՀ նախագահ Սերժ Սարգսյանի ելույթի որոշ դրույթներ ուղղված էին ներքին լսարանին, բայց մեծ մասամբ այն ուղղված էր արտաքին լսարանին: Sputnik Արմենիա ռադիոկայանի հետ զրույցում ասել է քաղաքագետ Նարեկ Գալստյանը՝ մեկնաբանելով ՀՀ նախագահի ելույթը ՄԱԿ-ի գլխավոր վեհաժողովի 70-րդ նստաշրջանում:

Քաղաքագետը նշում է՝ ելույթում կար չորս հիմնական շեշտադրում՝ Սիրիա, Իրան, արցախյան հակամարտություն և Հայոց ցեղասպանության հարյուրամյակ: «Առաջինը՝ Հայոց ցեղասպանության վերաբերյալ հատվածն էր, երախտիքի խոսքն ուղղված 100-ամյակի միջոցառումներին մասնակցող պետություններին, ոճիրը դատապարտած երկրներին: Մյուս շեշտադրումը՝ սիրիական իրադարձությունների համատեքստում էր: Հայաստանի նախագահը շնորհակալություն էր հայտնում Գերմանիային, Շվեդիային, որոնք պատրաստակամություն էին հայտնել փախստականներին ընդունելու: Մյուս ասպեկտը՝ Իրանի շուրջ վերջին զարգացումների մասին էր, Հայաստանի նախագահը միաժամանակ հիշեցնում է, որ Թուրքիան շարունակում է ապօրինաբար փակ պահել սահմանը: Եվ ամենակարևորը՝ արցախյան հիմնախնդրի թեման էրե,-թվարկել է բանախոսը:

Արցախյան հիմնախնդրի կարգավորման վերաբերյալ նախագահը շեշտել է, որ գործընթացը երկար ժամանակ տեղից չի շարժվում՝ Ադրբեջանի անօրինական գործողությունների պատճառով: Ադրբեջանը չի հետևում համանախագահների կոչերին, սահմանագծից ետ չի քաշում դիպուկահարներին: Ոչ մի տեղաշարժ չկա սահմանային միջադեպերի միջազգային հետաքննության հարցում, Ադրբեջանը հպարտանում է սպառազինությունների գերկուտակմամբ: «Նշվեց ևս կարևոր մի բան, որ Ադրբեջանը սկսել է կիրառել խոշոր տրամաչափի զինատեսակներ՝ նույնիսկ խաղաղ բնակչության նկատմամբ: Նախագահը հստակ հայտարարեց, որ այսուհետև Հայաստանը կկիրառի բոլոր անհրաժեշտ իրավական ու ռազմաքաղաքական մեխանիզմները՝ Ադրբեջանին զսպելու համար: Սա տարբեր լսարաններին ուղղված հայտարարություն էր»,-ընդգծել է քաղաքագետը:

ՄԱԿ-ն աշխարհի միակ կառույցն է, որտեղ ներկայացված են բոլոր ճանաչված պետությունները, և այն համարվում է հիմնական խուսափողը: Բայցևայնպես, ինչպես նկատում է Նարեկ Գալստյանը, միջազգային հարաբերություններում ՄԱԿ-ն այլևս չունի առանցքային դերակատարություն:

«Այս ամենն ունի սիմվոլիկ նշանակություն, ոչ մի իրավական հետևանքներ չեն ունենում այս հայտարարությունները, սա խորհրդանշական երևույթ է, որն ունի որոշակի սոցիալ-հոգեբանական նշանակություն»,-պարզաբանել է քաղաքագետը: